Federaldy rezerv júıesiniń kelesi jylǵy tóraǵasy kim bolady

ASTANA.KAZINFORM — Federaldy rezerv júıesi Basqarýshy keńesiniń tóraǵasy Djerom Paýell qyzmetin aıaqtaıtynyn málimdedi, al AQSh prezıdenti onyń ornyn basatyn adam izdeıdi, dep habarlaıdy Fox Business.

Paýelldiń Federaldy rezerv júıesiniń tóraǵasy retindegi merzimi 2026 jyldyń mamyr aıynda aıaqtalady, ol bul organdy segiz jylǵa jýyq basqardy.

— Men bul qyzmetimdi qazirgi turaqty ekonomıkalyq jaǵdaıda ornymdy basatyn adamǵa tapsyrǵym keledi. Meniń bar qalaýym osy, — dedi Paýell.

Federaldy rezerv júıesiniń tóraǵasy sonymen qatar «ınflıatsııanyń baqylaýda bolýyn jáne 2%-dyq mólsherge oralýyn qalaıtynyn» aıtty. 

— Men tóraǵalyq merzimimniń aıaqtalýyn kútip otyrmyn. Ázirge basqadaı jańa eshteńe aıta almaımyn, — dedi bolashaǵyna qatysty suraqqa jaýap bergen Paýell.

Donald Tramp kelesi jyly álemdegi eń qýatty ortalyq banktiń basshysy etip kimdi taǵaıyndaıtynyn qarastyryp jatqandyqtan, kimniń tóraǵa bolatyny týraly másele barǵan saıyn ózekti bolyp barady.

Tramp Federaldy rezerv júıesiniń tóraǵasy laýazymyna eki úmitkerdi qarastyryp jatqanyn málimdedi: burynǵy Federaldy rezerv júıesiniń tóraǵasy Kevın Ýorsh jáne Ulttyq ekonomıkalyq keńes dırektory Kevın Hassett.

— Meniń oıymsha, bizde eki Kevın bar. Meniń oıymsha, eki Kevın de keremet. Taǵy birneshe laıyqty adam bar, — dedi Donald Tramp.

Tramp The Wall Street Journal gazetine bergen suhbatynda sársenbide Aq úıde Ýorshpen kezdeskenin jáne áleýetti úmitkerden paıyzdyq mólsherlemelerdi tómendetýge senýge bola ma dep suraǵanyn rastady.

Suhbatta Tramptan bir jyldan keıin qandaı paıyzdyq mólsherlemeni elestetetini suraldy, al prezıdent «1% jáne múmkin odan da tómen. Bizde álemdegi eń tómengi mólsherleme bolýy kerek» dep jaýap berdi, al tómen mólsherlemeler ulttyq qaryzǵa qyzmet kórsetý qunyn tómendetetinin qosa aıtty.

Buǵan deıin AQSh federaldy rezerv júıesi stavkasyn nólge deıin tómendetkenin habarlaǵan ediik.