Federatsııa kýbogy: Zarına Dııas Qazaqstan - Qytaı matchyn tamasha bastady
ASTANA. QazAqparat - Astanada Federatsııa kýbogy úshin irikteý kezeńiniń fınalynda Qazaqstan men Qytaı quramalary kúsh synasýda, dep habarlaıdy QazAqparat tilshisi.
Jeńimpaz qurama Álemdik toptyń pleı-off kezeńine joldama alatyndyqtan, bul matchtyń mańyzy zor.
Kortqa alǵashqy bolyp Qazaqstannan Zarına Dııas, Qytaıdan Chjen Saısaı shyqty. Zarına álemdik reıtıngte 96-orynda bolsa, qarsylasy 42-satyda edi.
Kezdesýdi Zarına tamasha bastap, qos birdeı breıkpen alǵa shyqty - 4:0. Degenmen qytaılyq qyz da qalyspaı, qatarynan úsh geımdi aldy. Budan keıin qazaqstandyq tennısshi taǵy bir breık jasady - 5:3. Sodan keıin setke dop bergende, qarsylasyna múmkindik bergen joq - 6:3.
Z.Dııas ekinshi partııany breıkpen bastap, sodan soń tartysty ótken óz geımin jibermedi - 2:0. Sol breıktiń arqasynda únemi alǵa shyǵyp otyrdy - 3:1, 4:2. Sosyn taǵy bir breık jasady - 5:2. Zarına sońǵy geımde úshinshi matchbolyn paıdalana bildi - 6:2.
Tartysty ótken báseke 1 saǵat 35 mınýtqa sozyldy.
Kezdesý barysynda otandasymyz tamasha óner kórsetip, qytaılyq sportshynyń adymyn ashtyrmady. Buǵan deıin Z.Dııas bir-birin jaqsy biletin Chjen Saısaıdan bes ret jeńilgen eken, búgin sonyń esesin qaıyrdy.
Keshe Qazaqstan - Úndistan matchynda Zarına Dııastyń oıynyn Elbasy Nursultan Nazarbaev tamashalap, qoldaý bildirgen bolatyn. Sodan keıin Zarına ınstragramdaǵy paraqshasynda Prezıdenttiń ózine saǵat syılaǵanyn jarııalaǵan edi. Búgin Z.Dııas Elbasy syılyǵynyń ózin shabyttandyryp, jeńiske jigerlendirgenin jetkizdi.
Búgin ekinshi oıynda Qazaqstannyń birinshi, álemniń 43-raketkasy ıÝlııa Pýtıntseva reıtıngte ózinen úsh saty joǵary turǵan Chjan Shýaımen sheberlik baıqasady. Sodan keıin Galına Voskoboeva men Anna Danılınanyń ıAfan Van jáne Ifan Sıýıdiń juptyq kezdesýi josparlanǵan.
Eske sala keteıik, budan buryn Astanada ótip jatqan Federatsııa kýbogy úshin irikteý kezeńinde Qazaqstan - Úndistan matchyn áýeli Zarına Dııastyń jeńispen bastap, ıÝlııa Pýtıntsevanyń jalǵastyrǵanyn, sosyn Galına Voskoboeva men Anna Danılınanyń juptyq kezdesýdi utqanyn, al erler arasynda Aleksandr Býblıktiń Býdapesht týrnıriniń jartylaı fınalyna shyqqanyn jazǵan bolatynbyz.
