Federatsııa kýbogy: Qazaqstannyń tennısshi qyzdary Argentınamen oınaıdy
NUR-SULTAN. QazAqparat – Halyqaralyq tennıs federatsııasy Londondaǵy shtab-páterinde Federatsııa kýbogynyń bıylǵy pleı-off básekesiniń jerebesin jarııa etti, dep habarlaıdy QazAqparat tilshisi.
Qazaqstan tennıs federatsııasy málim etkenindeı, qazaqstandyq qyzdar Argentına quramasymen kezdesedi.
Bes oıynnan turatyn match 17-18 sáýir kúnderi Argentınada ótedi. Kezdesýdiń dál qaıda bolatyny keıin anyqtalady.
Pleı-off básekesiniń basqa juptary mynadaı: Polsha – Brazılııa, Meksıka – Ulybrıtanııa, Serbııa – Kanada, Latvııa – Azııa/Tynyq muhıty aımaǵynyń jeńimpazy, Japonııa – Ýkraına, Rýmynııa – Italııa, Nıderlandy – Azııa/Tynyq muhıty aımaǵynyń jeńimpazy.
Qazaqstan quramasy argentınalyqtardy jeńse, onda 2021 jyly aqpanda ótetin Federatsııa kýbogynyń irikteý kezeńinde qaıtadan baq synaıtyn bolady. Bıyl qazaqstandyqtar osy kezeńde belgııalyqtarǵa jol bergen edi.
Argentınalyqtar amerıkalyq aımaqtyń jeńimpazy retinde pleı-off básekesine joldama aldy. Santıagoda olar Meksıkadan (2:1), Chılıden (2:1), Perýdan (3:0) jáne Kolýmbııadan (2:0) basym tústi.
Argentına óz tarıhynda Federatsııa kýbogynda 1964, 1983, 1985, 1987, 1992, 2001 jáne 2004 jyldary shırek fınalda oınady. Eki márte (1986 jáne 1993 jyldary) jartylaı fınalǵa deıin jetti.
Joǵary dıvızıonda Argentına sońǵy ret 2015 jyly 7-8 aqpanda synǵa túsip, Býenos-Aıreste AQSh quramasynan (1:4) jeńilip qaldy.
Dúnıejúzilik reıtıngte 172-orynda turǵan 23 jastaǵy Nadıa Podoroska Argentınanyń 1-raketkasy bolsa, qurama kapıtany – burynǵy kásibı tennısshi, 53 jastaǵy Mersedes Pas.
Eske sala keteıik, budan buryn Aleksandr Býblıktiń Rotterdam týrnıriniń ekinshi aınalymyna shyqqanyn, al ıÝlııa Pýtıntsevanyń Sankt-Peterbýrgte jeńilip qalǵanyn jazǵan bolatynbyz.
