Federatsııa kýbogy: Qazaqstan Taılandty juptyq básekede de utty
ASTANA. QazAqparat - Ulttyq tennıs ortalyǵynda Federatsııa kýbogy úshin ótip jatqan irikteý kezeńinde Qazaqstan taılandtyqtardy juptyq básekede de jeńdi, dep habarlaıdy QazAqparat tilshisi.
Qazaqstandyqtar Galına Voskoboeva men Anna Danılına Peangtarn Plıpýek jáne Varýnıa Vongteanchaımen kúsh synasty.
Bıyl 35-ke tolatyn tájirıbeli tennısshi G.Voskoboevanyń sońǵy jyldary juptyq synǵa den qoıyp júrgeni belgili. Onyń ózinen 11 jas kishi A.Danılınamen jup quryp, Federatsııa kýbogy jolyndaǵy saıystarǵa qatysýy ıÝ.Pýtıntseva men Z.Dııasqa túsetin júkti azaıtatyny túsinikti.
Qazaqstandyq jup birinshi partııada birden breık jasap, 3:0 esebimen alǵa ketti. Aqyry sol basymdylyǵynan aıyrylǵan joq - 6:3.
Ekinshi partııany A.Danılına men G.Voskoboeva breıkpen bastady - 2:0. Bul joly da 6:3 esebimen qazaqstandyq jup jeńiske jetti.
Báseke 1 saǵat 14 mınýtqa sozyldy.
Osylaısha qazaqstandyqtar «A» tobynda Taıland quramasyn 3:0 esebimen tize búktirdi.
Búgin sondaı-aq «V» tobynda Qytaı quramasy Okeanııadan basym tússe, Koreıa Indonezııany utty.
7 aqpan kúni Qytaı - Koreıa, Úndistan - Taıland, Indonezııa - Okeanııa quramalary ózara synǵa túsedi. 8 aqpanda Qazaqstan - Úndistan, Qytaı - Indonezııa, Koreıa - Okeanııa kezdesedi. Sodan keıin «A» jáne «V» tobynda jeńimpaz atanǵandar 9 aqpan kúni fınalda ekinshi Álemdik toptyń pleı-off kezeńine beriletin joldamany sarapqa salady.
2018 jyly Úndistanda ótken osyndaı jarysta qazaqstandyqtar fınalda Japonııaǵa jol bergen bolatyn.
Eske sala keteıik, budan buryn Zarına Dııastyń Qazaqstandy alǵa shyǵaryp, ıÝlııa Pýtıntsevanyń esepti eselegenin jazǵan bolatynbyz.
