FCI tóreshisi: Álemde qazaqy tazyǵa qyzyǵýshylyq artyp keledi
ASTANA. KAZINFORM – Qazaqy tazy úshinshi ret World Dog Show dúnıejúzilik kórmesine qatysyp, jyl saıyn joǵary nátıjeler kórsetip keledi. Bul týraly Halyqaralyq kınologııa federatsııasynyń (FCI) bedeldi tóreshileriniń biri Barbara Mıýller málimdedi, dep habarlaıdy Kazinform agenttiginiń Eýropadaǵy menshikti tilshisi.
Shveıtsarııada turatyn Barbara Mıýller halyqaralyq sanattaǵy barlyq tuqym boıynsha tóreshi, selektsıoner jáne FCI basqarma múshesi ekenin aıtty.
– Men búkil ómirimdi ıtterge arnadym. Osydan tórt apta buryn Qazaqstanda boldym jáne rıngte qazaqtyń ulttyq tuqymyna jatatyn 40-tan astam tazyny baǵaladym. Bul tuqymmen tanysý óte qyzyqty boldy. Kez kelgen el sııaqty Qazaqstanda da óńirler ártúrli. Keıbir ıtter taýly aımaqtardan shyqqan, endi bireýleri shóldi óńirlerden. Bul olardyń dene bitimi men súıek qurylymynan anyq baıqalady, – dedi Barbara Mıýller.
Onyń aıtýynsha, Qazaqstanǵa kelip, ulttyq tuqymdy baǵalaý úlken áser qaldyrǵan.
– Bul ádemi tuqymdy baǵalaý men úshin erekshe tájirıbe boldy. Tazynyń 2023 jyly FCI Bas assambleıasynda aldyn ala moıyndalǵanyna óte qýanyshtymyn. Meniń oıymsha, álemde kásibı mamandardyń qazaqy tazyǵa degen qyzyǵýshylyǵy barǵan saıyn artyp keledi, – dedi ol.
Barbara Mıýller Bolonıadaǵy Qazaqstannyń ulttyq stendine de joǵary baǵa berdi.
– Óte ádemi. Adamdar Qazaqstandy elestetkende kóz aldyna dál osyndaı kórinis keledi. Bul keremet jasalǵan. Maǵan tazynyń ózi de unaıdy. Óte sabyrly ıt. Qazir kıiz úıdiń ishinde tynyǵyp jatyr. Sizder qoldanǵan túster men materıaldar bizdiń elde joq. Sondyqtan basqa halyqtardyń mádenıetimen tanysý árdaıym qyzyqty, – dedi halyqaralyq tóreshi.
Aıta keteıik, Bolonıada ótken World Dog Show 2026 álem chempıonatynda qazaqstandyq «Chelsı» atty tazy jas ıtter arasyndaǵy tazy tuqymdastar tobynda tórtinshi oryn aldy.
