FBR Soltústik Karolınada Jańa jyl qarsańynda josparlanǵan teraktiniń aldyn aldy
ASTANA. KAZINFORM — AQSh Federaldyq tergeý bıýrosy Soltústik Karolına shtatynda Jańa jyl qarsańynda birqatar terrorıstik shabýyl jasaýdy josparlaǵan kúdiktini ustaǵanyn málimdedi. Bul týraly Kazinform menshikti tilshisi NBC News-ke silteme jasap habarlaıdy.
Kúdikti — Soltústik Karolınanyń Mınt-Hıll qalasynyń 18 jastaǵy turǵyny Krıstıan Sterdıvant. Oǵan sheteldik terrorıstik uıymǵa materıaldyq qoldaý kórsetýge árekettený sekildi birneshe aıyp taǵyldy.
FBR men AQSh Ádilet mınıstrliginiń dereginshe, Sterdıvant «Islam memleketi» terrorıstik uıymynyń (Qazaqstanda tyıym salynǵan uıym - red.) ıdeologııasynan áser alyp, Mınt-Hıll qalasyna jaqyn mańdaǵy Sharlott eldi mekeninde ornalasqan azyq-túlik dúkeni men Burger King qoǵamdyq tamaqtaný ornyna shabýyl jasaýdy josparlaǵan.
Resmı tulǵalardyń aıtýynsha, ol bul áreketke shamamen bir jyl boıy daıyndalǵan. Internette atalǵan uıymǵa qatysty materıaldardy jıi qarap, TikTok jelisinde soǵan baılanysty vıdeolar jarııalaǵan.
Sterdıvanttyń úıinde júrgizilgen tintý kezinde quqyq qorǵaý organdary onyń shabýyl jospary egjeı-tegjeıli jazylǵan jazbalardy jáne paıdalanbaq bolǵan zattardy anyqtady. Olardyń qatarynda tósek astyna jasyrylǵan balǵalar men pyshaqtar bar. Bul týraly Soltústik Karolınanyń Batys okrýgi boıynsha AQSh prokýrory Rass Fergıýson málimdedi.
Sondaı-aq kúdiktiniń jatyn bólmesinen taktıkalyq qolǵaptar men kevlar jıleti tabylǵan. Al qoljazba túrde jazylǵan jazbasynda ol polıtsııa qolynan qaza tabýdy qalaǵanyn bildirgen.
Tergeý derekterine sáıkes, Sterdıvant túrli LGBT tárizdi áleýmettik top ókilderine, quqyq qorǵaý organdary qyzmetkerleri men áskerı qyzmetshilerge shabýyl jasaýdy kózdegen. Ol ınternet arqyly jasyryn jumys istegen polıtsııa qyzmetkerleri men FBR agentterimen baılanysqa shyǵyp, olardy terrorıstik uıym músheleri dep oılaǵan.
Sterdıvant FBR-diń nazaryna alǵash ret 2022 jyly, ol kámeletke tolmaǵan kezde ilikken. Sol ýaqytta ol kórshisin balǵa men pyshaqpen óltirý maqsatynda úıinen túgeldeı qara kıim kıip shyqqan, alaıda ony atasy toqtatqan. Ol kezde oǵan qatysty eshqandaı aıyp taǵylmaı, tek psıhologııalyq kómek kórsetilgen.
Qazir is boıynsha tergeý jalǵasyp jatyr. Aldyn ala málimet boıynsha, kúdikti jalǵyz áreket etken.
Aıta keteıik, buǵan deıin FBR Mıchıgan shtatynda Helloýın kezinde bolýy múmkin teraktiniń aldyn alǵanyn habarlaǵan edi. Al qazan aıynda AQSh-ta ekstremızmge baılanysty birneshe adam ustalǵan bolatyn.
Sondaı-aq AQSh-tyń arnaıy qyzmeti Los-Andjeleste jańa jyl túni terrorıstik shabýyldar uıymdastyrmaq boldy degen kúdikpen tórt adamdy ustaǵanyn málimdedi.
