FBB Kalıfornııadaǵy atysty lańkestik aktige jatqyzdy
ASTANA. QazAqparat - AQSh Federaldyq barlaý bıýrosy Kalıfornııadaǵy atysty lańkestik aktige jatqyzdy, dep habarlady Lenta.ru vedomstvonyń los-andjelestik bıýrosy dırektorynyń orynbasary Devıd Boýdıchke silteme jasap.
«Bizge belgili aqparattar men faktilerdi negizge ala otyryp, biz qazirgi kezde osy jantúrshigerlik oqıǵany lańkestik aktisi retinde tergeý júrgizýdemiz», - dedi ol jýrnalısterge.
Agenttikke eki derekkóz habarlaǵandaı, tergeýshiler atysqa qatysqan Tashfın Malıktiń Reseıde tyıym salynǵan «Islam memleketi» kóshbasshysy Ábý Bákir ál-Baǵdadıge adaldyqqa ant bergenin kórsetetin aıǵaqtardy tekserýde.
FBB basshysy Djeıms Komı vedomstvo atys uıymdastyrýshylardyń lańkestikpen baılanysyn joqqa shyǵarmaıdy. Sonymen birge, onyń aıtýynsha, atys uıymdastyrýshylardyń qandaıda bir lańkestik uıymdar men jelilerdiń múshesi ekendigin aıǵaqtaıtyn málimetter joq. Osy oqıǵaǵa deıin olar bıýronyń nazaryna ilinbegen.
Budan buryn atys uıymdastyrýshylardyń «Islam memleketimen» qandaı da bir baılanysy bolmaǵany habarlanǵan bolatyn, al lańkestik qurylym Malık jáne onyń kúıeýi Saıd Rızvan Farýk degen adamdardyń baryn «tipti bilmegen»..
Facebook áleýmettik jelisiniń qzymetkeri qupııa túrde Associated Press agenttigine Malık laqap atpen shabýyl bastalar aldynda birneshe mınýt buryn ál-Baǵdadıdy maqtap, habarlama jazǵanyn málimdedi. Qazirgi kezde materıal lańkestikke qarsy zańnama talaptaryna sáıkes alynyp tastalǵan.
Ókimet oryndarynyń anyqtaǵanyndaı, 27 jastaǵy Malık pákistandyq bolǵan jáne Saýd Arabııasynda ósken. 2014 jyly ol AQSh-qa neke vızasymen kóship kelgen. Onyń kúıeýi, 28 jastaǵy Farýk Chıkagoda Pákistannan shyqqan otbasynda dúnıege kelgen, Kalıfornııada ósken. Ol meıramhanada sanıtarlyq ınspektor bolyp jumys jasaǵan. Amerıkandyq ókimet oryndary vıza berer aldynda Malıkti teksergende odan kúdikti eshteńe baıqamaǵan.
San-Bernardınodaǵy atys 2 jeltoqsanda jergilikti ýaqytpen saǵat 11:00-diń shamasynda bolǵan. Qylmyskerler áleýmettik qamsyzdandyrý ortalyǵynyń konferents-zalyna basyp kirip, bólmedegi adamdarǵa oq jaýdyrǵan. Onyń saldarynan 14 adam mert boldy, taǵy 21-i jaralandy.
Farýk pen Malık quqyq qorǵaý organdarymen atys barysynda joıylǵan. Qylmys jasalǵan kúni er adam áýeli osy ortalyqtaǵy keshke qatysqan, alaıda birqatar ýaqyttardan keıin ketip qalyp, jaqtasymen birge qolyna qarý alyp qaıtyp kelgen.
