Fatıma Irnazarova jyljymaly nysana kózdeýden álem chempıony atandy
ASTANA. KAZINFORM — Jyljymaly nysana kózdeýden Estonııa astanasy Tallınde ótip jatqan álem chempıonatynda qorjynymyzǵa júlde tústi.
10 metr qashyqtyqtan jyljymaly nysanaǵa oq atýdan jeke saıysta Fatıma Irnazarova top jarsa, Zýhra Irnazarova qola júldege ıe boldy.
Fatıma Irnazarova fınaldyq básekede Ýkraına sportshysy Vıktorııa Rybovalovadan 6:2 esebimen basym tússe, qola júlde úshin talasta Zýhra Irnazarova Majarstan ókili Bıanka Barbara Farkasn Ketselıdi 6:4 esebimen jeńdi.
Aıta ketetin jaıt, irikteý kezeńinde Zýhra Irnazarova 573 upaı jınap, jasóspirimder arasyndaǵy álem rekordyn jańartty.
20-26 shilde aralyǵynda jalǵasyp jatqan jahandyq dodada 17 elden 100-ge jýyq sportshy qatysyp jatyr.
Eske salaıyq, buǵan deıin Aleksandra Le Qytaıdaǵy álem kýbogy kezeńinde úzdik ondyqqa bir qadam jetpeı qalǵanyn habarlaǵan edik.
