Fastfýdtyq júıelerdi oǵan qoıylatyn talaptardy kúsheıtý arqyly ǵana retteýge bolady - depýtat M.Aısına
ASTANA. Aqpannyń 12-si. QazAqparat /Gúlmıra Álıakparova/ - Búgingi kúni tek Qaraǵandy, Almaty jáne Aqtóbe oblystary ǵana 1 men 4-shi synyptar aralyǵyndaǵy oqýshylardy tegin ystyq tamaqpen qamtamasyz etip otyr. Bul týraly búgin Astanadaǵy «Báıterek» medıa-ortalyǵynda ótken baspasóz máslıhatynda QR Parlamenti Májilisiniń depýtaty Maıra Aısına aıtty,
dep habarlaıdy QazAqparat.
Baspasóz máslıhaty qazaqstandyqtardyń tamaqtaný sapasyna, onyń ishinde bastaýysh synyp oqýshylaryn ystyq tamaqpen qamtý sondaı-aq, fastfýdtardy jabý máselesin zańnamalyq túrde retteý taqyrybyna arnaldy.
M.Aısınanyń sózine qaraǵanda, Qazaqstanda sapaly tamaqpen qamtamasyz etý zańnamalyq turǵyda óte qatań rettelgen, biraq bar másele onyń júzege asyrylýy men oryndalýynda. «Tamaq ónimderiniń qaýipsizdigi týraly» QR Zańynyń 13-shi babyna sáıkes balalardyń tamaqtanýy arnaıy maqsattaǵy ónimderge jatady. Deıturǵanmen, Qazaqstanda áli kúnge deıin Balalardyń tamaǵyn daıyndaıtyn kombınat joq. Barlyǵyn syrt elderden jetkizemiz. Biraq ne ákelip jatqanymyzdy ózimiz de aıta almaımyz. Sondyqtan biz qazir deni saý emes urpaq ósirip otyrmyz», - dedi ol.
Depýtattyń aıtýynsha, mektep jasyndaǵy balalardy sapaly tamaqpen qamtamasyz etý máselesin halyq qalaýlylary birneshe márte kótergen. Nátıje joq emes - bar. Búgingi kúni respýblıka boıynsha barlyq mektepterdiń ashanalarynan jyldam daıyndalatyn taǵamdar, ıaǵnı fasfýdtar tolyǵymen alyndy. Sonymen birge, Almaty, Qaraǵandy jáne Aqtóbe oblystarynyń jalpy bilim berý mekemeleri 1 men 4-shi synyp aralyǵyndaǵy oqýshylardy, olardyń áleýmettik jaǵdaıyna baılanyssyz tolyǵymen ystyq tamaqpen qamtamasyz etip otyr. Bul qatarǵa bıylǵy jańa oqý jylynda Astana qalasynyń mektepteri de qosylmaq.
M.Aısınanyń atap kórsetýinshe, qalǵan aımaqtardy balalardy ystyq tamaqpen qamtýǵa zańnamalyq turǵyda májbúrleý múmkin emes. Sebebi másele jergilikti deńgeıde sheshilýi tıis. Sondaı-aq zańnamalyq júıemiz fastfýd ónimderin dúken sórelerinen alyp tastaýǵa qatysty da sharasyz, sebebi shaǵyn jáne orta bıznesti qoldaý saıasaty aldan shyǵady. Depýtattyń sózine qaraǵanda, fastfýdtyq júıelerdi oǵan qoıylatyn talaptardy kúsheıtý arqyly ǵana retteýge bolady.
