Fashızm qurbandarynyń kúlimen sýret saldy
ASTANA. 9 jeltoqsan. QazAqparat - Shvetsııalyq sýretshi Karl Mıhael fon Haýssvolf fashıstik lager krematorııinen alynǵan kúlmen kartına salǵan.
Lýnd qalasynda kórmege qoıylǵan shyǵarma kópshiliktiń narazylyǵyn týǵyzyp otyr.
«Interfakstiń» habarlaýynsha, sýretshiniń eńbeginde sur tústi tikburysh beınelengen. Haýssvolf adamnyń kúli men sýdan basqa boıaý qoldanbaǵan. «Bul kúlde HH ǵasyrdyń eń ozbyr soǵysy kezinde azaptalyp, tozaqty kózben kórgen adamdardyń energııasy, jany, oıy saqtalǵandaı boldy. Qaǵazǵa juqqan boıaýymnan erekshe pishinder týdy», - deıdi qylqalam sheberi. Ol kúldi 1989 jyly Polshadaǵy burynǵy Maıdanek lageriniń murajaıynan urlap ketken eken. Arada 20 jyl ótkende ony shyǵarmashylyǵyna paıdalanýdy uıǵarǵan. Maıdanek murajaıynyń mamandary Haýssvolftiń áreketin jabaıylyq dep baǵalap, ony urlyǵy úshin jazalaýdy talap etse, Shvetsııadaǵy evreıler qaýymy sýretshi jazyqsyz qurban bolǵandardyń arýaǵyn qorlady dep esepteıdi. Maıdanek lagerinde 1,5 mln tutqyn bolǵan. Onyń 300 myńyn fashıster qorlyq-zorlyqtan soń gazǵa tunshyqtyryp óltirdi. Tutqyndardyń deni evreıler men polıaktar boldy dep jazady «Alash aınasy» basylymy.
