Farýh Toqtasynov Strandja týrnıriniń kúmis júldegeri atandy

ASTANA. KAZINFORM — Bolgarııa astanasy Sofııa qalasynda ótip jatqan halyqaralyq Strandja týrnırinde Farýh Toqtasynov (70 keli) kúmis júldeger atandy.

Halyqaralyq týrnırde otandasymyz sheshýshi jekpe-jekte AQSh ókili Lavant Broýnlımen qolǵap túıistirdi. Óte tartysty ótken kezdesýdiń sheshýshi raýndynda dáldik tanytqan Lavant Broýlı 4:1 esebimen basym tústi.

Qazaqstandyq boksshy bul týrnırde 1/16 fınalda aýstrııalyq Arsen Chabıan, 1/8 fınalda túrkimenstandyq Baıramdýrdy Nurmuhammedovti 5:0 esebimen jeńse, ¼ fınalda germanııalyq Rendı Botıkalıdi 4:1 esebimen tize búktirdi. Al jartylaı fınalda ózbekstandyq Shavkatjon Boltaev alǵan jaraqatyna baılanysty jekpe-jekten bas tartyp, otandasymyz birden fınalǵa shyqqan edi.

Aıta ketsek, qazirge deıin halyqaralyq týrnırde Elına Bazarova (54 keli), Nadejda Rıabets (80 keli), Valerııa Aksenova (80 keliden joǵary), Danııal Sábıt (50 keli) chempıondyq tuǵyrǵa kóterilse, Laýra Esenkeldi (65 keli) kúmis júldeger atandy.

23 aqpan-2 naýryz aralyǵynda bolyp jatqan týrnırge 36 elden 300-den astam boksshy keldi. Olardyń arasynda Bolgarııadan bólek Qazaqstan, Ózbekstan, AQSh, Kýba, Ázerbaıjan, Brazılııa, Ýkraına, Mońǵolııa, Anglııa, Túrkimenstan, Qytaı Taıpeıi jáne ózge memleketter bar.

Aıta ketsek, Qazaqstan quramasy Bolgarııa astanasyna 39 boksshyny attandyrdy.

Bıyl «Strandja kýbogy» 77 márte ótkizip jatyr. Bul týrnır Eýropa qurlyǵyndaǵy tarıhı tereń sporttyq jarys sanalady.