Farmkompanııalar dári-dármekterdiń túpnusqalyǵyn baqylaýdy kúsheıtedi
ASTANA. KAZINFORM – Patsıentterdiń qaýipsizdigi úshin farmkompanııalar Qazaqstandaǵy dári-dármekterdiń túpnusqalyǵyn baqylaýdy kúsheıtedi. Bul týraly Úkimettiń baspasóz qyzmeti habarlady.
Dárilik zattardy tańbalaý jáne kontrafaktilik ónimdermen kúresý máseleleri patsıentterdiń qaýipsizdigin jáne farmatsevtıkalyq naryqtyń ashyqtyǵyn qamtamasyz etýde sheshýshi bolyp qala beredi. Bul týraly Polpharma Santo («Hımfarm» AQ) bas dırektory Adam Alekseıýk málimdedi.
Onyń aıtýynsha, serııalandyrý júıesi bıznes tarapynan da, memleket tarapynan da dári-dármekterdiń túpnusqalyǵyn tıimdi baqylaýǵa múmkindik beredi.
— Tańbalaý jáne serııalaý patsıentterdiń qaýipsizdigi úshin óte mańyzdy. Bul bizge zııatkerlik menshik quqyǵymyzdy qorǵaý úshin bıznesti de, patsıentter úshin kontrafaktilik ónimderdiń bolmaýyn qamtamasyz etý úshin memleketti de tolyq baqylaýǵa múmkindik beredi. Al dári-dármekterge qatysty kontrafakt — bul óte mańyzdy másele, — dep atap ótti ol Premer-mınıstr Oljas Bektenov ótkizgen QR Prezıdenti janyndaǵy Sheteldik ınvestorlar keńesiniń aralyq otyrysynyń alańynda.
Polpharma Santo Qazaqstan naryǵyna jetkiziletin barlyq ónimderdi tolyq serııalaýdy engizgen alǵashqy kompanııalardyń biri boldy. Qazirgi ýaqytta júıe jumys istep tur, alaıda, kompanııanyń pikirinshe, odan ári damytý jáne jetildirý qajet.
Adam Alekseıýktiń aıtýynsha, tutynýshylardyń dári-dármekterdiń túpnusqalyǵyn tekserýge qatysýyna nazar aýdarý kerek: azamattar dárihanadaǵy árbir qaptamany tekserip, QR kodyn skanerlep, preparattyń túpnusqalyǵyna kóz jetkizýi qajet. Sonymen qatar ol zańbuzýshylyqty anyqtaý jáne jedel den qoıý boıynsha memlekettik tetikterdi jetildirýdiń mańyzdylyǵyn atap ótti.
Aıta ketelik Bektenov Sheteldik ınvestorlar keńesiniń aralyq otyrysyn ótkizgen edi.