Farmatsevtıka salasyndaǵy qylmystyq shema: laýazymdy tulǵalar qamaýǵa alyndy

ASTANA. KAZINFORM – Ulttyq qaýipsizdik komıteti Sybaılas jemqorlyqqa qarsy is-qımyl qyzmeti farmatsevtıka salasyndaǵy qylmystyq shemalardy uıymdastyrýshylardy anyqtaý boıynsha jumysty jalǵastyryp jatyr.

Komıtettiń málimetinshe, medıtsınalyq buıymdardy otandyq óndirýdi jalǵan kórsetýge negizdelgen aýqymdy shema áshkerelenip, joly kesildi. «OrdaMed» AQ basshylyǵy Qazaqstan aýmaǵynda óz óndirisiniń bar ekeni týraly jalǵan qujattardy paıdalanyp, halyqtyń ál-aýqaty men densaýlyǵyn qamtamasyz etý úshin asa qajet 28 ataýdaǵy medıtsınalyq jabdyqty memlekettik emdeý mekemelerine jeńildetilgen sharttarmen jetkizý boıynsha zańsyz preferentsııalar alǵan.

Alaıda is júzinde daıyn medıtsınalyq jabdyq shetelden jetkizilgeni anyqtaldy. Nátıjesinde memleketke 4,5 mlrd teńge kóleminde zalal keltirilgen.

- Tintý sharalary barysynda «OrdaMed» AQ basshylyǵynan quny 1 mlrd teńgeden asatyn ınvestıtsııalyq monetalar tárkilendi. Sondaı-aq «Interdentica», «Erkin Brand» jáne «OrdaMed» kompanııalaryndaǵy qatysý úlesterine tyıym salyndy, - delingen aqparatta.

Sot sanktsııasymen «OrdaMed» AQ-nyń tehnıkalyq dırektory, burynǵy basqarma tóraǵasy jáne óndiristik basqarma basshysy qamaýǵa alyndy. Qazirgi ýaqytta sotqa deıingi tergep-tekserý júrgizilip jatyr.

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.

Aıta keteıik, depýtat Baqytjan Bazarbek jaqynda «SQ-Farmatsııa» isi jóninde tyń derekter jarııalanatynyn habarlady.