Farmatsevtıka salasyna aýdıt: 5 is Bas prokýratýraǵa joldandy

ASTANA. KAZINFORM – Elimizde farmatsevtıka salasyna júrgizilgen aýdıt qorytyndysy boıynsha 5 is Bas prokýratýraǵa joldandy. Bul týraly QR Joǵarǵy aýdıtorlyq palatasynyń  tóraǵasy Álıhan Smaıylov aıtty.

Májilistiń jalpy otyrysynda depýtat Murat Ábenov QR Joǵarǵy aýdıtorlyq palata tóraǵasynan dári-dármek baǵasyn shamadan tys kóterý faktisine kim jaýap beretinin surady.

– 5 materıaldy biz quqyq qorǵaý organdaryna jiberdik. Bas prokýratýra óz baǵasyn beredi. Ary qaraı tıisti quqyq qorǵaý organdaryna tergeý júrgizý úshin jiberedi dep oılaımyz, - dep jaýap berdi Álıhan Smaıylov.

Bul saýalǵa qosymsha QR Densaýlyq saqtaý vıtse-mınıstri Erjan Nurlybaev ta jaýap berdi.

– Densaýlyq saqtaý mınıstrliginiń Dári-dármek saıasaty departamenti ózge memlekettik atqarýshy organ ókilderimen birlese otyryp jańa shekti baǵa modelin qurýǵa jaýapty jumys tobyn qurdy. Ol topty ózim basqaramyn, - dedi vıtse-mınıstr.

Aıta keteıik, buǵan deıin QR Densaýlyq saqtaý mınıstri mindetin atqarýshy Ardaq Amangeldiuly «2029 jylǵa deıin otandyq dári-dármek kólemi 50 paıyzǵa jete me?» degen saýalǵa jaýap berdi.