Farmatsevtıka ónerkásibinde óndiris kólemi 9,1 paıyzǵa artty – Beıbit Atamqulov
«Aǵymdaǵy jyldyń 1 toqsannyń qorytyndysynda elimizdiń óńdeýshi ónerkásibi barlyq sektorlarynda oń úrdis saqtaldy. Jıyntyq kórsetkish 107,5 paıyzdy qurady. Mashına jasaý salasynda 121,8 paıyz ósim boldy. Avtokólik quraldary, treılerler jáne jartylaı tirkemeler (+20,7%), mashınalar men jabdyqtar óndirisi (+56,6%), ózge de kólik quraldary (+65,9%), kompıýterler, elektrondyq jáne optıkalyq jabdyqtar (+52,1%), elektr jabdyqtaryn jasaý (+9,8%), jóndeý jáne ornatý (+5,4%) artty», - dedi mınıstr Úkimet otyrysynda.
Onyń aıtýynsha, tústi metallýrgııada da oń dınamıka saqtalyp, ósim 3,4% boldy. Oǵan tazartylǵan altyn (+16%), tazartylǵan kúmis (+21%), quıma altyn (+32%), tazartylǵan mys (+1%) jáne basqa da kórsetkishterdiń ósimi esebinen qol jetkizildi. Qara metallýrgııada naqty kólem ındeksi 100,1% qurady. Shoıyn (+6%), kómirtekti bolat (+21%), ferro-sılıko-marganets (+27%) óndirisi ósti.
«Farmatsevtıka ónerkásibinde óndiris kólemi 9,1% artty. Saladaǵy ósim negizinen halyqtyń dárilik zattar men medıtsınalyq buıymdarǵa degen suranysynyń artýy esebinen boldy. Jeńil ónerkásipte óndiris 3,1% ósti. Oǵan kıimniń (+25,8%) jáne bylǵary ónimderdiń (+32,7%) ulǵaıýy áser etti. Dezınfektsııalyq quraldar men mıneraldyq tyńaıtqyshtarǵa suranystyń ósýi hımııa ónerkásibiniń óndiris kólemin arttyrdy. Ósim 14,2% qurady», - dedi Atamqulov.
Onyń sózine qaraǵanda, qurylys materıaldary óndirisi 130,1% boldy. Oǵan jylý oqshaýlaǵysh materıaldar (2 esege), portland-tsement (+35,3%), gıps (+9,7%), kirpishter (+8,2%) jáne qurylys eritindileri (+9,3%) óndirisiniń artýy esebinen qol jetkizildi.
