Farıza Ońǵarsynovanyń shákirti atyraýlyq oqýshylarǵa sheberlik sabaǵyn ótkizýde
ATYRAÝ. QazAqparat - Farıza Ońǵarsynovanyń shákirti Álııa Dáýletbaeva Atyraý qalasynda mektep oqýshylaryna sheberlik sabaq ótkizýde, dep habarlaıdy QazAqparat tilshisi.
Bul shara Astana qalasynyń 20 jyldyq mereıtoıyna oraı uıymdastyrylǵan onkúndik aıasynda ótýde.
Aqyn sheberlik sabaqtarynda óleń jazýdy eshkim úıretpeıtindigin, alaıda, óleń jazýǵa den qoıǵan qabiletti balalarǵa aqyndar tarapynan qoldaý kórsetilip, olardy baýlýǵa bolatyndyǵyn aıtty.
«Óleń jazý mindet emes, adam bolý mindet ekeni» adamzat balasynyń basty qaǵıdaty bolýy qajet», - dedi ol.
Sondaı-aq aqyn óziniń týyp-ósken jerin, ana tilin súıýdiń qudiretin bilýdiń ǵajaptyǵyna toqtaldy. Ondaı urpaqtyń ulttyń qamyna alańdaıtyn azamat bolyp qalyptasaryna ómirden túrli mysaldar keltirdi.
Álııa Dáýletbaevanyń sheberlik sabaǵynda, aldymen oqýshylar ózderiniń súıip oqıtyn aqyndarynyń óleńderin jatqa aıtsa, endi biri elordamyz Astanaǵa, týǵan jerge arnap jazǵan jyrshýmaqtaryn naqyshyna keltire oqydy.
