Farıza Ońǵarsynova Astanadaǵy Ulttyq Panteonǵa jerlendi
ASTANA. QazAqparat - Halyq aqyny, qoǵam jáne memleket qaıratkeri, Memlekettik syılyqtyń laýreaty Farıza Ońǵarsynova Astanadaǵy Ulttyq Panteonǵa jerlendi. Bul týraly elorda ákimdiginiń resmı saıtynda habarlandy.
Buryn habarlanǵandaı, Farıza Ońǵarsynovamen qoshtasý rásimi búgin Astanadaǵy «Kórme» ortalyǵynda ótken bolatyn. Aqyn 75 jasqa qaraǵan shaǵynda ómirden ozdy.
Farıza Ońǵarsynova 1939 jyly 25 jeltoqsanda Atyraý oblysynda dúnıege kelgen. Ol QR Memlekettik syılyǵynyń laýreaty, QR halyq jazýshysy, «Dostyq» ordenimen marapattalǵan. Pedagogıkalyq ınstıtýttyń fılologııa fakýltetin támamdaǵan. Muǵalim, mektep dırektory, gazet-jýrnaldarda tilshi jáne redaktor bolyp istegen.
Aqynnyń alǵashqy jyr jınaǵy «Sandýǵash» 1967 jyly jaryq kórdi. Sonymen qatar, «Jazýshy» baspasynan basqa da óleńder jınaǵy shyǵaryldy: «Melodııa» (1970), «Mazasyz shaq» (1972), «Asaý tolqyn» (1973), «Kógershinderim» (1974), «Býınoe rýslo» (1975), «Znoı» tańdamaly óleńderdiń bir tomdyǵy (1978). Aqynnyń orys tilindegi óleńderi «Jalyn» baspasynan jarııalandy - «Nejnost» (1977) jáne «Gonchaıa ptıtsa» (1988), Máskeýdegi «Molodaıa gvardııa» baspasynda «Trevogı» (1979), «Ojıdanıe solntsa» (1985) jáne «Sovetskıı pısatel» baspasynan «Ozarenıe» (1980) óleńder jınaǵy shyǵaryldy. Budan basqa, aqyn «Bıiktik» kórkemdik ocherkter jáne «Bizdiń Kámshat» derekti povesiniń avtory. F. Ońǵarsynova moldovalyq jazýshy S. Vangelıdiń «Gýgýtse shytyrmandary» povesin, S. Kapýtıkıan, E. Evtýshenko, R. Kazakovanyń óleńderin, sondaı-aq, Chılı aqyny P. Nerýdanyń «Júrektiń tórt mezgili» kitabyn qazaq tiline aýdarǵan.
Ulttyq Panteon - Qazaqstannyń belgili qoǵam jáne memlekettik qaıratkerlerine arnalǵan zırat. 2013 jyldyń qazanynda QR Prezıdenti Nursultan Nazarbaevtyń sheshimimen Ulttyq Panteonǵa alǵashqy bolyp belgili saıası qaıratker Oral Muhamedjanov jerlengen bolatyn.
