Farıza Ońǵarsynovanyń arhıv qory qundy qoljazbalarmen tolyqty
ASTANA. KAZINFORM — Kórnekti aqyn, memleket jáne qoǵam qaıratkeri, Qazaqstannyń Halyq jazýshysy Farıza Ońǵarsynovanyń QR Ulttyq arhıvindegi jeke qory taǵy da qundy qoljazbalarmen tolyqty. Bul týraly Mádenıet jáne aqparat mınıstrligi málim etti.
Aqynnyń uly Almas Ońǵarsynov anasynyń arhıvtik qujattaryn óz qolymen tabystap, bolashaq urpaqqa tól muranyń tolyq jetýi men ult ıgiligine aınalýyna múddeli ekenin jetkizdi.
— Arhıvke tapsyrylǵan qujattar 50-60-70 jyldardaǵy anamnyń óz qolymen jazǵan túpnusqa qoljazbalardan turady. Qazirgi kezde 50-ge jýyq kitaby jaryq kórgeni belgili. Anam barlyq shyǵarmasyn jazý mashınkasymen emes qolmen jazyp, baspaǵa usynatyn. Arhıvke tapsyrylǵan qoljazbalar arasynda «Shilde», «Daýa» sııaqty taǵy da basqa kitaptardyń túpnusqalary bar. Ótken jyly 85 jyldyq mereıtoı aıasynda da 50-ge jýyq murany tapsyrǵanbyz. Aqynnyń ómir joly men eńbegine qatysty qujattardy jınaqtap, kezeń-kezeńimen arhıvke ótkizip, qordy tolyqtyryp otyrmyz. Bul dúnıeler ǵalymdar, stýdentter jáne oıly oqyrmandar úshin qundy bolaryna senemin, — dedi Almas Ońǵarsynov.
Bul joly Almaty qalasynan Ulttyq arhıvke tórt qorap qujattar jetkizilgen. Onyń ishinde kitaptar, gazet-jýrnaldarǵa arnalǵan túpnusqa qoljazbalar, basylym betterinde jaryq kórgen shyǵarmalar, aýdarmalar, tulǵalar týraly materıaldar, oı-tolǵamdar, jas aqyn-jazýshylardyń aqynǵa jazǵan hattary jáne ózge de qundy jazba muralar bar.
Aıta keteıik, ótken jyly Farıza Ońǵarsynovanyń týǵanyna 85 jyl tolýyna oraı Ulttyq arhıvte aqynnyń jeke qory ashyldy. Onda aqynnyń óz qolymen jazǵan otbasylyq shejiresi men ómirbaıany, «Kógershinderim» óleńder jınaǵynan qoljazbasy, Muqaǵalı Maqataevtyń 60 jyldyǵynda sóılegen sózi, notalary, buryn-sondy jarııalanbaǵan fotosýretteri jáne hattary saqtaýly.
Eske sala keteıik, byltyr qazaq poezııasynyń máńgilik shamshyraǵy, uly aqyn Farıza Ońǵarsynovanyń týǵanyna 85 jyl toldy.