Farıza qazaq poezııasyndaǵy qaıtalanbas tulǵalardyń biri - Shómishbaı Sarıev
ALMATY. Qańtardyń 25-i. QazAqparat /Erbol Azanbek/ - Farıza qazaq poezııasyndaǵy qaıtalanbas tulǵalardyń biri.
Senbi kúni Almatyda ótken Farıza Ońǵarysynovanyń jyr keshinde aqynnyń áriptesi Shómishbaı Sarıev osyndaı pikir bildirdi, dep habarlaıdy QazAqparat.
«Biz poezııaǵa kelgen kezde Farızalarǵa qarap óstik. Ádebıetke birtindep kelip kórinetinder bar, birden jarq etip kórinetinder bar. Qazaq poezııasynda birden jarq etip kóringenderdiń biri - Farıza. Farızanyń poezııasy iri poezııamen úndes», deıdi Sh.Sarıev.
«Farıza týraly bir nárse esime túsip otyr. Bıbigúl Tólegenova apaıymyzdan suhbat alǵanmyn. Sonda Bıbigúl apamyz: «Meni qazaqtyń áıel ánshisi, ánshi ájesi dep aıtpaıdy. Men 70-ke, 80-ge keleıin, meni halyq qazaqtyń ánshi qyzy dep aıtady», degen edi. Búgingi Farıza da máńgi qartaımaıtyn qazaqtyń aqyn qyzy. Qazaq poezııasynda Jarasqan, Nurlan, Temirhan, Keńshilik bárimiz de Farıza poezııasymen sýsyndap ósken aqyndarmyz. Sondyqtan Farızany alyp tulǵaǵa teńeımiz. Qyz balanyń poezııasy, er adamnyń pozııasy joq. Sondyqtan Farıza - poezııanyń alyp tulǵasy. Farıza shyn máninde óleńdi aıalap kele jatqan, óleńniń aınymas dosy bolǵan adam. Poezııany aınymas máńgilik dosyndaı senip, aıalap kele jatqany aıqyn», deıdi Shómishbaı aqyn.
