Farıd Aqberdıev: Aýdan ákimderiniń qabyldaýyn úsh aı boıy kútip júrgender bar

NUR-SULTAN. QazAqparat – «Aýyl» partııasynyń múshesi Farıd Aqberdıev «El amanaty» jalpyulttyq saýalnamasy týrasynda pikir bildirdi, dep habarlaıdy QazAqparat tilshisi.

«Bul – óte mańyzdy shara. Biraq osynaý qujattyń basty qozǵaýshy kúshi – Prezıdent jarııalaǵan «Halyq únine qulaq asatyn memleket» kontseptsııasy bolýy kerek. Memleket basshysy alǵashqy Joldaýyn halyqqa jarııalaǵan kezde azamattar ony qýanyshpen qabyldady. Prezıdent tipti áýe bıletteriniń baǵasy boıynsha da másele kótergen edi. Qazirgi ýaqytta osy tapsyrmaǵa sáıkes aýdan, qala nemese oblys ákimderiniń qabyldaýynda bolý tártibin jeńildetý kerek. Búgingi kúni aýdan ákimderiniń qabyldaýyn úsh aı boıy kútip otyrǵandar bar. Sol sebepti «birinshi» basshylarmen kezdesý múmkindigi jeńil bolsa eken. Adamdarda suraq kóp. Osy másele rettelse deımiz», - dedi Farıd Aqberdıev partııanyń saıası keńesiniń otyrysynda.

Eske sala ketsek, «Aýyl» halyqtyq demokratııalyq patrıottyq partııasy «El amanaty» atty jalpyulttyq saýalnamasyn júrgizgeli jatyr.

Saýalnamaǵa Qazaqstan Respýblıkasynyń 18 jasqa tolǵan azamattarynan qoǵamdaǵy saıası-áleýmettik jáne ekonomıkalyq máselelerdi jınaqtap, olardy sheshý joldaryn aıqyndaýǵa baǵyttalǵan.

Jalpyulttyq saýalnamanyń negizgi maqsattary – árbir azamattyń múddesin qorǵaý, qoǵamdaǵy ózekti máselelerdi anyqtap, tıisti úkimettik organdarǵa jetkizý, elimizdiń damýy boıynsha turǵyndarmen pikir almasý, el turǵyndarymen tyǵyz baılanys ornatý, saýalnama uıymdastyrý arqyly Qazaqstan Respýblıkasynyń árbir azamatynyń qoǵamymyzdy damytýdaǵy ózindik úlesin qosýyna múmkindik berý, qoǵam ómirindegi «Aýyl» partııasynyń saıasatyn qalyptastyrý úshin ózekti de naqty usynystardy el turǵyndarynan jınaqtaý bolyp otyr.