«Farabi hub» - ǵylymdy óndiriske engizýdi jedeldetedi

ASTANA. KAZINFORM - Memleket basshysy Qasym-Jomart Kemeluly Toqaev ekonomıkalyq jáne áleýmettik damýdyń negizgi basymdyǵy retinde ýnıversıtet ǵylymyn jáne ınfraqurylymyn damytý mańyzdylyǵyn únemi nazarda ustap keledi.

Osyǵan sáıkes, Ál-Farabı atyndaǵy Qazaq ulttyq ýnıversıtetinde «Farabi Hub» ınnovatsııalyq ónimder men joǵary tehnologııalyq jobalar ortalyǵy boı kóterdi.

Foto: Ál-Farabı atyndaǵy QazUÝ-dyń baspasóz qyzmeti

QazUÝ-dyń 90 jyldyq mereıtoıy aıasynda ashylǵan habtyń maqsaty – ozyq bilimge, tehnologııalar men resýrstarǵa qol jetkizýdi qamtamasyz ete otyryp, ǵylymı ázirlemeler men tehnologııalyq ıdeıalardy naqty ekonomıkaǵa engizýdi jedeldetý.

Bul týraly Ál-Farabı atyndaǵy QazUÝ Basqarma tóraǵasy-Rektory Janseıit Túımebaev Ál-Farabı atyndaǵy Qazaq ulttyq ýnıversıtetinde Almaty qalasynyń ákimdigimen birlesip uıymdastyrylǵan «Ǵylym, bıznes jáne óndiris yqpaldastyǵy» atty forýmda arnaıy toqtaldy.

Foto: Ál-Farabı atyndaǵy QazUÝ-dyń baspasóz qyzmeti

– «Farabi Hub» ýnıversıtettermen jáne ǵylymı ınstıtýttarmen, sondaı-aq ınvestor kompanııalarmen áriptestik baılanys ornatady. Birlesken zertteýler júrgizilip, jańa tehnologııalar ázirlenedi. Sońǵy úlgidegi qurylǵylarmen jabdyqtalǵan ǵylymı zerthanalar ǵylym men tehnologııanyń ártúrli salalarynda zertteýler júrgizip, tájirıbe jasaýǵa múmkindik beredi, – dedi oqý ornynyń basshysy.

Munda ZTE, «ZooStan» Ortalyq Azııany zertteý jónindegi halyqaralyq ǵylymı-zertteý ortalyǵy, Soltústik-batys polıtehnıkalyq ýnıversıtetimen birlesken mıkrospýtnıkter zerthanasy, Bıologııa jáne bıotehnologııa zerthanasy, Hımııa jáne hımııalyq tehnologııa zerthanasy, Zamanaýı qoldanbaly fızıka jáne joǵary tehnologııalar zerthanasy, «Robototehnıka jáne mehatronıka RoboMech» ǵylymı-bilim berý ortalyǵy, Dárilik ósimdikterdi ǵylymı-zertteý ortalyǵy, Sot saraptamalary ortalyǵy, Ǵylymı-tehnologııalyq park ornalasqan.

«Farabi Hub» ortalyǵynyń jalpy aýdany 5000 sharshy metrdi quraıdy.

Foto: Ál-Farabı atyndaǵy QazUÝ-dyń baspasóz qyzmeti