FAO Qazaqstanmen seriktestigin taǵy 10 jylǵa uzartady

ASTANA. KAZINFORM — BUU Azyq-túlik jáne aýyl sharýashylyǵy uıymy Qazaqstanmen seriktestigin taǵy 10 jylǵa uzartady. Bul týraly Astana halyqaralyq forýmynda FAO bas dırektory Tsıýı Dýnıýı aıtty. 

Tsıýı Dýnıýı Qazaqstannyń óńirdegi agrarlyq azyq-túlik júıesin transformatsııalaýdaǵy úlesin joǵary baǵalap, respýblıkamen seriktestik baǵdarlamasyn taǵy 10 jylǵa uzartýǵa daıyn ekendigin bildirdi.

— Bizdiń Qazaqstanmen 10 jyldyq baǵdarlamamyz qazirdiń ózinde nátıje berip jatyr. Sondyqtan biz osynaý seriktestikti taǵy 10 jylǵa uzartýǵa daıynbyz. FAO-nyń 100 jyldyq mereıtoıyn atap óter kezde baıqap otyrmaǵanymyzdy, áreket etkenimizdi maqtanyshpen aıtatyn bolamyz. Bizge aıryqsha yntymaqtastyq, barynsha tıimdilik pen naqtylyq qajet. Bıyl 16 qazanda ekinshi dúnıejúzilik soǵystan keıin qurylǵan uıymymyzdyń 80 jyldyq mereıtoıyn atap ótýine jınalamyz, — dedi ol.

Sonymen qatar ol Ortalyq Azııanyń jahandyq protsesterdegi róline toqtaldy. Onyń paıymynsha, Ortalyq Azııa geografııalyq, ekonomıkalyq jáne klımattyq turǵydan alǵanda mańyzdy túıisý núktesi sanalady.

— Qazaqstan — aýmaǵy jaǵynan Ortalyq Azııadaǵy eń úlken el. Prezıdent myrzanyń eldi óńirdegi jáne álemdegi azyq-túlik haby retinde tanytý oıy respýblıkanyń óńirlik deńgeıde zor úlesi baryn kórsetedi, — dedi mártebeli meıman.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.  Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan.

Іs-sharany ashqan Qasym-Jomart Toqaev elimiz SryptoCity dep atalatyn jańa pılottyq jobany júzege asyrýdy josparlap otyrǵanyn, Qazaqstan BUU Qaýipsizdik Keńesiniń quramyn keńeıtýdi qoldaıtynyn aıtty.