Fantasttardyń hıkaıalary shyndyqqa aınalyp keledi - mınıstr Abaev

ASTANA.QazAqparat - QR Aqparat jáne kommýnıkatsııalar mınıstri Dáýren Abavtyń aıtýynsha, aǵymdaǵy jyldyń aıaǵyna deıin poıyzdarda joǵary jyldamdyǵy bar ınternet bolady. Alaıda mınıstr adamdardyń kitapty oqyǵandy qoıyp, ǵalamtordyń jeteginde ketkenine alańdaıdy, dep habarlaıdy QazAqparat tilshisi.

«Árıne, poıyzdarda joǵary jyldamdyǵy bar ınternettiń bolǵany durys. Sonyń arqasynda qazaqstandyqtar fılmderdi kórip, áleýmettik jelilerde otyra alady. Men ózim oılaımyn, atalǵan bastamanyń jaǵymsyz jaǵy da bar. Áli esimde, Almatyǵa baryp júrgende jolǵa 20 saǵat ketetin. Sonda men Almatyǵa bara jatqanda eki kitap, qaıtqanda eki kitap oqyp shyǵatynmyn. Sebebi basqa eshteńe bolmady. Al ınternettiń taralýymen adamdar «vızýal» bola bastaıdy. Olar barlyq aqparatty tek oıyn-saýyq kontenti arqyly ǵana qabyldaıdy», - dedi Abaev búgin Eýrazııalyq medıa forýmnyń jahandyq aqparattandyrý sessııasynda.

Mınıstrdiń oıynsha, aqparattyq tehnologııalardyń damyǵany jaqsy. Degenmen, ınternetti qoldanǵanda asa saq bolý qajet. «Men mınıstr retinde buqaralyq aqparat quraldaryn ǵana emes, baılanys pen kommýnıkatsııalar máselesin de úılestirip kelemin. Sol sebepti uly fantasttardyń hıkaıalary shyndyqqa aınalyp jatqanyn barǵan saıyn túsinip jatyrmyn»,- dep atap kórsetti mınıstr.