Family Park turǵyn úı kesheni jyl sońyna deıin turaqty elektr kózine qosylady - ákimdik

ASTANA. QazAqparat – Qalalyq orta sapasy jáne baqylaý basqarmasynyń basshysy Dáýlet Dosqulov Astanadaǵy Family Park turǵyn úı kesheni jyl aıaǵyna deıin turaqty elektr kózine qosylatynyn málim etti, dep habarlaıdy QazAqparat tilshisi.

«Prıgorodnyı» aýdanynda Family Park deıtin turǵyn úı kesheni bar. 2017 jyly berilýi kerek edi. «Bıznes klass» sanatyndaǵy 4 qabatty úı bolýy kerek edi. Ústine taǵy 3 qabat qosyp jibergen. Zańsyz bolsa da 2021jyly oǵan adamdar kirgizilgen. Úleskerler páter qujatyn áli alǵan joq, kireberis joldary jasalmaǵan. Ákimdikke turǵyndardyń shaǵymyn aıtyp hat jazǵanbyz, áli jaýap joq», - dedi depýtat.

Qalalyq orta sapasy jáne baqylaý basqarmasynyń basshysy Dáýlet Dosqulovtyń aıtýynsha, sot atalǵan úıdegi qosymsha úsh qabattyń zańsyz salynǵany jóninde sheshim shyǵarǵan.

Biraq zańsyz salynǵan qabattarda da adamdar turyp jatqandyqtan, qujattaryn zańdastyrý joldary qarastyrylyp jatqan kórinedi.

«Bul keshen boıynsha qurylys salýshyǵa jan-jaqty kómektesip jatyrmyz. Jalpy nysannyń qańqasy salynyp bitti. Endi abattandyrý jáne turaqty elektrge jalǵaý máselesi qalyp otyr. Negizi qurylys kompanııasynyń aqshasy joq. Sońǵy páterlerdi satyp jatyr. Biz oǵan elektrge jalǵaý máselesin aqshasyz sheship berdik. «G-Park» aqysyz kómek usynyp otyr. Kábil tartý jumystaryn jeke baqylaýymda ustap otyrmyn. Bıyl búkil jumysty barynsha aıaqtaýdy josparlap otyrmyz. Elektr máselesin 100 paıyz sońyna jetkizemiz. Qosymsha úsh qabat zańsyz ekeni týraly sot sheshimi bar. Turǵyndardyń qujatyn sáýletke jaýapty adamdarmen birge qarastyryp jatyrmyz, sheshemiz», - dedi basqarma basshysy.