Fahrettın Altýn: AQSh pen Izraıldiń Iranǵa qarsy áreketi Taıaý Shyǵysta haos týǵyzady
ASTANA. KAZINFORM – Fahrettın Altýn AQSh-tyń Irannyń ıadrolyq nysandaryna jasaǵan áýe shabýyldaryn qatań synǵa alyp, bul áreketter Taıaý Shyǵystaǵy jaǵdaıdy odan ári ýshyqtyryp, haos pen beıbereketsizdikke aparatynyn eskertti, dep habarlaıdy Anadoly.
Ol halyqaralyq qaýymdastyqty arandatýshylyq pen halyqaralyq júıeni álsiretýge baǵyttalǵan radıkaldy jeliniń áreketterine qarsy turýǵa jáne kez kelgen máselelerdi sheshýde dıplomatııalyq joldy ustanýǵa shaqyrdy.
Túrkııa prezıdenti ákimshiliginiń kommýnıkatsııalar basqarmasynyń dırektory Fahrettın Altýn Irannyń ıadrolyq nysandaryna jasalǵan AQSh-tyń áýe soqqylary men Izraıldiń Iranǵa qarsy agressııasyna Vashıngtonnyń qosylýyn qatań synǵa aldy. Ol bul áreketter Taıaý Shyǵysta beıbitshilik pen turaqtylyqqa emes, kerisinshe, jańa deńgeıdegi haos pen beıbereketsizdikke aparatynyn málimdedi.
Altýn bul málimdemesin áleýmettik jelide jarııalady.
— AQSh-tyń Irandaǵy ıadrolyq nysandarǵa jasaǵan áýe soqqysy jáne Izraıldiń Iranǵa qarsy agressııasyna qosylýy — bul beıbitshilik pen turaqtylyqqa emes, haos pen tártipsizdikke aparatyn jańa qadam, — dedi.
Onyń aıtýynsha, AQSh-tyń Irak pen Aýǵanstanǵa áskerı ınterventsııasynan bastalǵan protsess álemde radıkalızm men terrorızmniń kúsheıýine alyp keldi, dál osy sııaqty Iranǵa qarsy shabýyl da osyndaı saldarǵa soqtyrýy múmkin.
— AQSh-tyń áskerı ınterventsııalary Batysta Eýropanyń saıası kartasyn ózgertetin dınamıkany týǵyzdy, musylmandarǵa qarsy ksenofobııa men óshpendilikti órshitti, al Shyǵysta antıamerıkandyq jáne batysqa qarsy kóńil kúıdi kúsheıtti, — dedi ol.
Altýn eger Amerıka Izraıldiń genotsıdtik áskerı saıasatyn tejeýdiń ornyna Netanıahý ákimshiliginiń baqylaýsyz áreketterine erse, bul búkil álemdegi beıbitshilikke qol jetkizýdi odan saıyn alystatatynyn eskertti.
Fahrettın Altýn halyqaralyq qaýymdastyqty parasatty ustanymdar tóńireginde birigip, halyqaralyq júıeni álsiretýge jáne arandatyp buzýǵa baǵyttalǵan radıkaldy jelige qarsy turýǵa, sondaı-aq óńirlik jáne jahandyq máselelerdi sheshýde dıplomatııany basshylyqqa alýǵa shaqyrdy.
— Prezıdent Rejep Taıyp Erdoǵannyń basshylyǵymen Túrkııa órkenıetter arasyndaǵy beıbitshilikti nasıhattap, Shyǵys pen Batys arasyndaǵy úılesimdilikti nyǵaıtýǵa, óńirlik jáne jahandyq turaqtylyqqa úles qosatyn saıası ustanymyn jalǵastyra beredi, — dep túıindedi ol.
Eske salaıyq, AQSh Irannyń ıadrolyq nysandaryna soqqy jasaǵan bolatyn. Donald Tramp bul operatsııany sátti dep baǵalady.