Factcheck.kz aqparatty tekserý boıynsha Meta kompanııasynyń seriktesi atandy
ASTANA. KAZINFORM – Meta korporatsııasy Facebook, Instagram jáne Threads jelilerindegi dezınformatsııany áshkereleý úshin qazaqstandyq Factcheck.kz saıtyn vırýsty dezınformatsııa men jalǵan aqparatty anyqtaıtyn baǵdarlamasyna qosty.
Saıttyń habarlaýynsha, úshinshi taraptyń faktilerdi tekserý baǵdarlamasy 2016 jyldan beri jumys istep keledi. Sodan beri oǵan dúnıe júzinde 60-tan astam tilde jumys isteıtin ári Halyqaralyq faktchekıng jelisiniń (IFCN) qatań irikteýinen ótken 100-den astam táýelsiz uıym qosyldy.
«Meta jalǵan aqparatpen tıimdi kúresý úshin kontenttiń ras-ótirigin tekseretin álemniń túkpir-túkpirindegi táýelsiz faktchekerlermen seriktestik ornatqan. Faktchekerler aqparatty jalǵan, ishinara jalǵan ıa bolmasa ózgertilgen dep baǵalaǵan soń, Meta paıdalanýshylardyń ol jańalyqty kórý múmkindigin azaıtady. Bul jalǵan aqparattyń taraýyn tejep, ony kóretin adam sanyn azaıtýǵa kómektesedi. Jalǵan kontentti jıi jarııalaıtyn paraqshalar, toptar men akkaýnttardyń kórilimi azaıyp, olardyń monetızatsııa men jarnama jasaý múmkindikteri shekteledi. Jazba jalǵan dep belgilense, Meta jazbany kórgen ne ony bóliskisi kelgen adamdarǵa bul týraly eskertedi», - dep jazylǵan Factcheck.kz habarlamasynda.
Aıta keterligi, faktchekerler kontentti ne akkaýnttardy joıýmen ıa bolmasa olardy Meta platformalarynda buǵattaýmen aınalyspaıdy. Faktchekerler Facebook, Instagram jáne Threads jelilerindegi jalǵan aqparatty áshkerelep, qanshalyqty burmalanǵany jóninde baǵa beredi.
Meta kompanııasynyń strategııalyq seriktestikti damytý menedjeri Nıkol Han Factcheck.kz pen Meta seriktestigi týraly oıyn bildirip, «Meta platformalaryndaǵy jalǵan aqparatty azaıtýǵa qatysty jumysymyz jalǵasyp jatyr jáne búgin Factcheck.kz Meta kompanııasynyń Qazaqstandaǵy úshinshi taraptyń faktilerdi tekserý baǵdarlamasyna qosylǵanyna qýanyshtymyz. Meta platformalaryn qoldanýshylardyń senimdi aqparat tutynýy úshin istep jatqan jumysymyzǵa Factcheck.kz atsalysady», - dedi.
Factcheck.kz – 2017 jyldan beri jumys istep kele jatqan MediaNet Halyqaralyq jýrnalıstıka ortalyǵynyń jobasy, Ortalyq Azııadaǵy alǵashqy kásibı faktchekıng resýrsy. 2018 jyldan beri álemniń jetekshi faktchekerlerin biriktiretin Halyqaralyq faktilerdi tekserý jelisiniń (IFCN) sertıfıkattalǵan múshesi.
