Facebook Úndistandy tegin ınternetpen qamtamasyz etti
ASTANA. QazAqparat - Facebook úndistandyq alty shtatty tegin bazalyq onlaın-servısimen qamtamasyz etip, óziniń Internet.org jobasyn iske qosty. Bul týraly Facebook-tiń bas dırektory Mark Tsýkerberg óziniń áleýmettik jelisindegi paraqshasynda málim etti, dep habarlady lenta.ru.
«Biz jańa ǵana Úndistanda Internet.org jobasyn qosyp, densaýlyq saqtaý, bilim berý, jumys izdeýge jáne tildesýge qoljetimdi bolýy úshin alty shtattyń adamdaryn tegin ınternet-servıske qostyq. Úndistanda bir mıllardtan astam adam Internetke qol jetkize almaı otyr - bul olar bizdiń kópshiligimiz úshin qalypty jaǵdaıǵa aınalyp ketken múmkindikterdi paıdalanýdan tys qalyp otyr degen sóz, al álem olardyń ıdeıalary men kreatıvtiliginen aıyrylyp otyr», - dep jazady Tsýkerberg.
Facebook basshysynyń aıtýynsha, úndistandyq alty shtattyń turǵyndary Wikipedia, BBC jańalyqtary, sondaı-aq Facebook-tiń ózi sııaqty otyzdan astam ınternet-servıske tegin qol jetkize alady.
«Sońǵy jyly biz Internet.org tegin servısterin jalpy sany 150 mıllıon adamdy quraıtyn Afrıka jáne Latyn Amerıkasy elderine qostyq. Alty mıllıonnan astam adam buryn ınternetke qol jetkize almady, endi oǵan ıe boldy. Úndistan sııaqty búkil álemdegi barlyq adamdardyń ınternet múmkindigin paıdalanýyna kómektese alatyn kún de týar», dep atap ótedi Tsýkerberg.
Budan buryn jobaǵa Gana, Zambııa, Kenııa, Kolýmbııa jáne Tanzanııa qosyldy. Degenmen Úndistan búginde serpindi damyp kele jatqan iri el, endi onda da Internet.org. jumys jasaı bastady. Taldamashylardyń boljamdaryna qaraǵanda, Úndistan kóp keshikpeı Facebook-ti paıdalanýshylar jaǵynan AQSh-ty basyp ozady. Internet.org qaıyrymdylyq bastamasynyń maqsaty álem boıynsha bes mıllıard adamdy ınternetke qosý (negizinen áńgime kedeı afrıkandyq elder halqy týraly bolyp otyr). Facebook jobasy aıasynda áriptesterdiń kómegimen onlaın-servıske tegin qosý, elektrondy málimetter berý tıimdiligin arttyrý jáne ınternetke qosylý qunyn 100 ese tómendetý josparlanýda.
