Facebook sýıtsıdke beıim adamdardy anyqtaı bastady
ASTANA. QazAqparat - Facebook áleýmettik jelisi ózine ózi qol salýǵa beıim adamdardy jasandy aqyl-oı arqyly anyqtaıtyn bolady, dep habarlaıdy Rıa Novostı agenttigi Bı-bı-sı-ge silteme jasap.
Agenttiktiń habarlaýynsha, Facebook jelini qoldanýshylar jazyp qaldyrǵan jazbalar arqyly olardyń ıeleri týraly aqparat beretin algorıtm qurastyrdy. Jasandy aqyl-oı jeli qoldanýshylaryna olardyń dostarynan kelgen «Men saǵan alańdap otyrmyn», «Sende bári durys pa?» degen maǵynadaǵy sózderdi anyqtap otyrady.
Bı-bı-sı-diń málimetteri boıynsha, jelige qoldanýshylar jazyp qaldyrǵan sózderge arnaıy saraptama júrgiziledi de sol arqyly adamnyń kómekti qajet etetinin nemese qajet etpeıtinin belgili bolady. Saraptamanyń qorytyndysy arnaıy zertteýshilerge jiberiledi.
Atalmysh baǵdarlamamen jumys isteıtin bólim basshysynyń habarlaýynsha, mundaı sharalar paıdaly ǵana emes, asa qajet te. Atalǵan joba ázirge tek AQSh-ta ǵana júzege asyrylýda.
Facebook ókilderi sonymen qatar adamnyń júıke júıesin zertteýmen aınalysatyn birneshe uıymmen birge jumys istep jatqandyǵyn jetkizdi. Sýıtsıdke beıim jeli qoldanýshylary endi olarmen arnaıy alań arqyly jedel túrde habarlasa alady. Buǵan qosa áleýmettik jeli onlaın-translıatsııa kezinde de ózine-ózi qol salýǵa beıim turatyn adamdardy anyqtaý tetigin oılastyrýda.
