Facebook qoldanýshylarynyń fotolaryna ruqsatsyz kirgen Meta-ǵa 805 mln eýro aıyppul salyndy
ASTANA. KAZINFORM — Italııada Meta kompanııasy Facebook qoldanýshylarynyń fotolaryna ruqsatsyz qol jetkizgeni úshin 805 mıllıon eýro aıyppul tóleıtin boldy, dep habarlaıdy Anadoly.
Italııanyń Jeke derekterdi qorǵaý basqarmasy (Garante della Privacy) Meta kompanııasyna 805 mıllıon eýro aıyppul saldy. Buǵan Facebook áleýmettik jelisiniń Android qurylǵylaryndaǵy galereıalarda saqtalǵan fotolar men beınejazbalarǵa qoldanýshylardyń arnaıy ruqsatynsyz qol jetkizýi sebep bolǵan.
Vedomstvonyń jazbasha málimdemesine sáıkes, aıyppul Meta kompanııasynyń Irlandııadaǵy bólimshesine salynǵan. Sonymen qatar retteýshi organ fotolar men beınejazbalarǵa arnaıy ruqsatsyz qol jetkizýge múmkindik beretin fýnktsııany 60 kún ishinde óshirýdi mindettegen.
Mundaı sheshimge Facebook qosymshasynyń ıtalııalyq Android qoldanýshylarynyń smartfondarynda saqtalǵan fotolarǵa, beınejazbalarǵa jáne olarǵa qatysty derekterge arnaıy kelisimsiz ári tıisti aqparat bermeı qol jetkizgeni negiz bolǵan.
Áńgime 2023 jyly iske qosylǵan «Facebook-ti paıdalaný kezinde galereıadan usynystar alý» fýnktsııasy týraly bolyp otyr.
Bul fýnktsııaǵa qatysty tergeý 2025 jylǵy shildede Boltsano tutynýshylar quqyǵyn qorǵaý ortalyǵynyń shaǵymynan keıin bastalǵan.
Aıyppul mólsherin belgileý kezinde retteýshi organ birneshe faktordy eskergen. Olardyń qatarynda Italııada Android júıesin paıdalanatyn shamamen 20 mıllıon adamnyń bolýy, zańbuzýshylyqtyń uzaqtyǵy, kompanııaǵa 2019 jyly berilgen burynǵy nusqama jáne tergeý barysynda vedomstvomen jetkilikti deńgeıde yntymaqtaspaý jaǵdaılary bar.
Málimdemege sáıkes, aıyppul somasy tıisti kompanııalar tobynyń álemdik aınalymynyń shamamen 0,47 paıyzyna teń.
Budan buryn Meta Instagram qoldanýshylarynyń naqty jasyn anyqtaý úshin JI qoldanatynyn jazǵanbyz.
