Facebook, Instagram jelilerinde qazaq tildi kontentti damytý máseleleri qaraldy

ASTANA. QazAqparat – Oqý-aǵartý mınıstri Ashat Aımaǵambetov Meta kompanııasynyń ókilderimen kezdesti, dep habarlaıdy QazAqparat.

«Meta» kompanııasynyń ókilderimen kezdestim. Bul kompanııanyń quramyna Facebook, Instagram jáne What’s App messendjeri sııaqty áleýmettik jeliler kiredi.

Osy áleýmettik jeliler keńistiginde bilim berý salasyndaǵy yntymaqtastyq jáne ony tanymal etý máselelerin talqyladyq.

Biz úshin bilim berý baǵytyndaǵy kontentti, ásirese ony qazaq tilinde nasıhattaý jáne balalardy qajetsiz, jaǵymsyz kontentten qorǵaý máseleleri mańyzdy. «Metanyń» Ortalyq Azııadaǵy úkimetpen baılanys jónindegi basqarýshy dırektory men basqa da áriptester bastamalarymyzdy qoldaǵanyna qýanyshtymyn.

Facebook platformasynda muǵalimderimiz belsendi túrde óz pikirlerin bildirip, túrli problemalardy kóterip, jańalyqtarmen bólisip otyrady. Sonymen qatar búgingi kúni muǵalimderimiz Instagram alańyn belsendi paıdalanyp, oqýshylarǵa belgili bir pán týraly málimet berip, sol arqyly balalardyń oqýǵa degen qyzyǵýshylyǵyn, yntasyn arttyryp júr»,- dep jazdy mınıstr jelidegi paraqshasynda.

Sonymen qatar mınıstr pedagogterdiń oqýshylardy oqý-tárbıe úderisine zamanaýı tásildermen tartýǵa degen umtylysy maqtaýǵa turarlyq ekenin jetkizdi.

«Djordj Chen áriptesterimen birge qazaqstandyq muǵalimder men ata-analardyń áleýmettik jelilerdegi belsendiligin atap ótip, muǵalimderge arnaıy trenıngter ótkizýdi usyndy. Olar muǵalimderdi balalardy oqytýda túrli tsıfrlyq resýrstardy belsendi paıdalanýǵa úıretýge baǵyttalady», - dep tolyqtyrdy Oqý-aǵartý mınıstri.

Foto: www.facebook.com/askhat.aimagambetov