Facebook basshysy Garvard ýnıversıtetine 12,1 mln dollar aýdardy

ASTANA. QazAqparat - Facebook áleýmettik jelisiniń negizin qalaýshy Mark Tsýkerberg pen onyń jubaıy Prıstsılla Channyń Qaıyrymdylyq qory Garvard ýnıversıtetine 12,1 mln dollar bóldi. Bul týraly Massachýsetste ornalasqan atalmysh oqý ornynyń baspasóz qyzmeti málim etti, dep habarlaıdy TASS.

Qaıyrymdylyq aqsha memlekettik qyzmet salasynda eńbek etýge nıetti jaǵdaıy tómen otbasylardan shyqqan stýdentterge granttar bólýge jumsalady.

JOO-dan habarlaǵandaı, Qor kómeginiń arqasynda aldaǵy 15 jylda 2,3 myń stýdentke tegin granttar beriletin bolady.

«Biz Prıstsılla men Markke jáne olardyń qoryna kómek úshin jáne stýdentterimizge olardyń shyǵý tegine nemese materıaldyq jaǵdaıyna qaramastan, halyq ıgiligine jumys tańdaý múmkindigi úshin alǵys bildiremiz», - dep atap ótti ýnıversıtet prezıdenti Drıý Faýst.

Tsýkerberg pen onyń jubaıy Chan Garvardta bilim alǵan. Alaıda Facebook-tiń negizin qalaýshy Tsýkerberg jeliniń paıda bolýymen kelgen tanymaldylyqtan keıin oqýyn tastap ketti. Chan ýnıversıtetti aıaqtady.