Facebook aqparat ındýstrııasyn qoldaýǵa 1 mlrd dollar ınvestıtsııalamaq

NUR-SULTAN. QazAqparat – Amerıkanyń Facebook kompanııasy aldaǵy úsh jylda aqparat ındýstrııasyn qoldaý úshin 1 mlrd dollar qarjyny ınvestıtsııalaýdy josparlap otyr. Bul týraly kompanııanyń jahandyq saıasat jáne kommýnıkatsııalar jónindegi vıtse-prezıdenti Nık Klegtiń sársenbi kúni jarııalaǵan bloktaǵy málimdemesinen belgili boldy, dep jazady TASS.

Avstralııa bıligimen daýly jaǵdaıdy retteý týraly túsinikteme bergen Klegg Facebook-tiń jańalyq taratýshy basylymdarmen seriktestik qatynastardy retke keltirýge nıetti ekenine sendirdi.

«Sondyqtan biz 2018 jyldan beri aqparat ındýstrııasyn qoldaýǵa 600 mln dollardy ınvestıtsııalap, aldaǵy úsh jylda taǵy 1 mlrd dollar qarjyny ınvestıtsııalaýdy josparlap otyrmyz», - dep aqparattandyrdy ol.

Facebook vıtse-prezıdenti amerıkalyq kompanııanyń ótken aıda The Guardian, The Daily Telegraph, Financial Times, Daily Mail, Sky News jáne taǵy basqa BAQ-tardyń áleýmettik jelidegi paraqshalarynda ornalastyrylǵan kontent úshin tólem jasaý boıynsha kelisim jasalǵanyn eske saldy. Osyǵan uqsas kelisimder amerıkalyq aqparat taratýshy basylymdarymen jasaldy, sonymen qatar Germanııa jáne Frantsııa elderiniń BAQ-pen belsendi kelissózder júrgizilip jatyr.