Facebook 600 myń qoldanýshysynyń ústinen qupııa eksperıment júrgizgeni úshin keshirim surady
ASTANA. QazAqparat - Facebook kompanııasynyń resmı ókili Sherıl Sandberg áleýmettik jeliniń 600 myńnan astam qoldanýshysynan olardyń ústinen júrgizgen psıhologııalyq eksperıment úshin keshirim surady, dep jazady sheteldik BAQ.
«Biz eshkimdi de renjitkimiz kelmeıdi, bul eksperımentti qyzmet sapasyn arttyrý úshin jasadyq», - deıdi ol.
Tarqatyp aıtsaq, Facebook kompanııasy avtomatty túrde jarty mıllıonnan astam jeli qoldanýshysyn tańdap alyp, olarǵa zertteý júrgizgen. Mamandar tańdalyp alynǵan adamdardy eki topqa bólip, olardyń bir tobyna jaǵymdy jańalyqtar jiberip, ekinshi tobyna jaǵymsyz aqparattar jibergen. Osynyń nátıjesinde qoldanýshylardyń bul jańalyqtardy qalaı qabyldaıtyny jáne olarǵa qandaı áser bergeni málim bolǵan. Qoldanýshylar óz sezimderin alǵan aqparattaryn talqylaý barysynda bildirgen.
Bundaı sharanyń ótkendigi jarııalanǵannan keıin qoldanýshylar áleýmettik jeli basshylaryn synnyń astyna aldy. Biraq kompanııa ókilderi zertteý júrgizilgen adamdar jaıly aqparattyń eshqaıda tarap ketpeıtini, qupııa saqtalatyny týraly habarlap, olardyń alańdaýyna esh negiz joq ekendigine sendirip baqty.
