Face-ID júıesi inisiniń ornyna UBT tapsyrmaq bolǵan «talapkerdi» orta joldan qaıtarǵan

NUR-SULTAN. QazAqparat – Bıylǵy UBT kezinde inisiniń ornyna test tapsyrmaq bolǵan bir adam áshkere boldy, dep habarlaıdy QazAqparat tilshisi.

Ǵylym jáne joǵary bilim mınıstrligi «Ulttyq testileý ortalyǵy» mekemesiniń dırektory Rýslan Emelbaev ortalyq kommýnıkatsııalar qyzmetiniń brıfınginde osyndaı málimet aıtty.

«Biz barlyq beınejazbaǵa 31 jeltoqsonǵa deıin taldaý jasaımyz. Eger tyıym salynǵan zattardy paıdalaný faktileri anyqtalsa, talapker bilim berý grantynan aıyrylady. Esterińizde bolsa, bul norma 2020 jyly alǵash ret qoldanylǵan edi. 2020 jyly beınejazbalardy qaıta qaraý nátıjesinde 152 testilenýshiniń, 2021 jyly 52 talapkerdiń nátıjesi joıylǵan bolatyn. Postproktorıng nátıjesi boıynsha qazirgi tańda 15 adamnyń nátıjesi joıyldy. 200-den astam talapkerdiń nátıjeleri tekseris ústinde. UBT-ǵa daıyndyq jáne tapsyrý barysynda biz talapkerlerdi birneshe ret akademııalyq adaldyqqa shaqyrdyq. Bul olarǵa bolashaqta jaqsy maman bolýǵa múmkindik beredi», - dedi Rýslan Emelbaev.

Vedomstvo ókili bıyl testileý alǵash ret «1 kompıýter – 2 kamera – 1 testilenýshi» qaǵıdasy boıynsha ótkizilgenin eske saldy.

«Oqýǵa túsýshiniń test tapsyrý ornynda negizgi kameradan basqa, testilenýshiniń dybysyn jazý jáne qozǵalysyn tirkeý úshin aldyńǵy veb-kamera ornatylady. Frontaldy veb-kamera talapkerdiń jeke basyn sáıkestendirýge jáne UBT kezinde bógde adamdardyń kirýin boldyrmaýǵa múmkindik beredi. UBT-nyń úshinshi aptasynda qatysýshy óziniń ornyna basqa tulǵany, ıaǵnı, aǵasyn jibergen. UBT-ǵa kirgizý barysynda Face-ID jeke basyn sáıkestendirý júıesi bógde adamdy anyqtady. Tıisti is-sharalar qabyldandy. Esterińizge sala ketsem, ótken jyly bundaı 18 jaǵdaı anyqtalǵan edi», - dedi ortalyq dırektory.

Eske salsaq, buǵan deıin UBT-ǵa shpargalka, telefon alyp kirgen talapker oqýdan shyǵarylǵanyn habarlanǵan edik.

Foto: bilimdinews.kz