Face ID: Jolaýshylar elorda áýejaıynda bıometrııalyq sáıkestendirýden ótetin bolady
Astana halyqaralyq áýejaıynan jolaýshylar bıometrııalyq sáıkestendirý arqyly tirkeýden ótýi múmkin, dep habarlaıdy Kazinform áýejaıdyń baspasóz qyzmetine silteme jasap.
Astana halyqaralyq áýejaıynan jolaýshylar bıometrııalyq sáıkestendirý arqyly tirkeýden ótýi múmkin, dep habarlaıdy Kazinform áýejaıdyń baspasóz qyzmetine silteme jasap.
Qazir áýejaı basshylyǵy elordanyń áýe qaqpasyna zamanaýı tehnologııany engizý múmkindikterin qarastyryp, kedergilerdi saraptap jatyr. Bıometrııalyq sáıkestendirý arqyly tirkeý júrgizýdi qoldanysqa engizýge elimizdegi bıometrııalyq bazanyń bir jerge shoǵyrlandyrylmaǵany kedergi bolyp tur. Atalǵan máseleni jýyq arada sheshý jáne áýejaıdaǵy tsıfrlandyrý deńgeıin arttyrý máleleri jóninde QR Kólik vıtse-mınıstriniń orynbasary Maqsat Qalıaqparovtyń tóraǵalyǵymen áýejaıda jıyn ótti.
«Astana halyqaralyq áýejaıy IATA halyqaralyq áýe kóligi qaýymdastyǵy men ICAO halyqaralyq azamattyq avıatsııa uıymymen tyǵyz áriptestik ornatqan. Ári osy halyqaralyq uıymdardyń standarttaryna sáıkes áýejaı qyzmetin damytýdy jalǵastyramyz. Bıometrııalyq sáıkestendirý baǵdarlamasyn engizýdi avıatsııa salasyndaǵy telekommýnıkatsııa jáne IT baǵdarlamalardy daıarlaýǵa negizdelgen shvedtsarııalyq aqparattyq uıym SITA-men birlese júrgizýge nıettimiz. Bıometrııalyq sáıkestendirýdiń kómegimen jolaýshylar reıske tirkelý kezinde barlyq qajetti operatsııalardy oryndaýǵa, qujattardy óz betinshe toltyrýǵa jáne basyp shyǵarýǵa, tólqujattyń elektrondy nusqasyn tolyq qoldanýǵa múmkindik alady», - dedi «Nursultan Nazarbaev halyqaralyq áýejaıy» AQ Basqarma Tóraǵasy Erǵazy Joldasov.
Aıta ketý kerek, SITA-men aldyn ala kelisim boıynsha 27-30 qarasha kúnderi jolaýshylardy bıometrııalyq sáıkestendirý arqyly tirkeý baǵdarlamasy Astana halyqaralyq áýejaıynda synaq rejıminde iske qosylady. Synaq rejımine arnaıy fokýs-top qurylǵan.
Jolaýshylardy bıometrııalyq sáıkestendirý arqylý tirkeý Dýbaı, Sıngapýr, Gankong, Serbııa jáne Pákistannyń halyqaralyq áýejaılarynda keń qoldanylady.
