Fabıo Arý Italııadaǵy velojarysta 11-orynǵa turaqtady
ASTANA. QazAqparat - Italııada bedeldi bir kúndik jarys «Djıro dell'Emılııa» ótti, dep habarlaıdy «QazAqparat» HAA astanaproteam.kz saıtyna silteme jasap.
Veloshabandozdar Bolonıadan San-Lýkaǵa deıingi 223,3 km qashyqtyqty artqa tastaǵan. «Astana» komandasy jarysqa abyroımen qatysyp, kapıtan Fabıo Arý úzdik ondyqqa iligýi de múmkin edi. Qorytyndy tizimde Arý 11-oryndy ıelendi, onyń izin ala Sergeı Chernetskıı keldi. Eki sportshy da jeńimpaz bolǵan ıtalııalyq Djovannı Vıskontıden 35 sekýnd keshikti. Ataqty sportshylar Vınchentso Nıbalı men kolýmbııalyq veloshabandoz Rıgoberto Ýrannyń qatysýy jarystyń shyraıyn ashty.
«Menińshe, jaqsy jarys boldy. Komanda alda kele jatty, jigitter Fabıo Arýǵa jaqsy uıymdasa bildi. Sońǵy kılometrlerde biz azdap báıge rıtmin saqtaı almaı qaldyq. «Výeltadan» keıin Fabıo Arý biraz ýaqyt úzilis jasap edi, Al Sergeı Chernetskıı jaqynda ǵana álem chempıonatyna qatysty. Komanda aıtýly nátıjelerge talasýǵa daıyn, kelesi jarystardyń ózinde-aq úlken jetistikterge jete alamyz dep oılaımyn», - deıdi komandanyń sport dırektory Brýno Chenıalta.
