Qazaqstan men AQSh arasynda tikeleı áýe qatynasyn ashýǵa daıyndyq júrip jatyr
ASTANA. KAZINFORM — Kólik mınıstrligi Azamattyq avıatsııa komıtetimen, Qazaqstannyń avıatsııalyq ákimshiligimen (QAÁ) jáne Qazaqstan Respýblıkasynyń AQSh-taǵy elshiligimen birlesip, eki jyl boıy Qazaqstan men AQSh arasynda tikeleı áýe qatynasyn ashý úshin qajetti jaǵdaılar jasaý boıynsha jumys istep keledi.
Atalǵan jumys aıasynda 2026 jylǵy 21–25 qyrkúıek aralyǵynda AQSh Federaldyq avıatsııa ákimshiliginiń (FAA) Halyqaralyq avıatsııalyq qaýipsizdikti baǵalaý (IASA) jumysy júrgiziledi.
Baǵalaýdyń bastalý qarsańynda Kólik vıtse-mınıstri Talǵat Lastaevtyń Qazaqstanǵa kelgen FAA sarapshylarymen kezdesýi ótti. Vıtse-mınıstr amerıkandyq tarap ókilderin qarsy alyp, olarǵa sapar men baǵalaýdy júrgizýge qatysqandary úshin, sondaı-aq sarapshylardyń jumysyna sáttilik pen jemisti nátıjeler tilep, alǵys bildirdi.
Kezdesý barysynda taraptar aldaǵy baǵalaý máselelerin jáne Qazaqstan men AQSh arasyndaǵy ushý qaýipsizdigi deńgeıin arttyrý jáne halyqaralyq áýe qatynasyn damytý jónindegi jumys sheńberindegi odan arǵy ózara is-qımyldy talqylady.
— Baǵalaý ushý qaýipsizdigin memlekettik qadaǵalaý júıesine qatysty júrgiziledi jáne Qazaqstan Respýblıkasynyń avıatsııalyq bıliginiń IKAO-nyń qoldanystaǵy standarttary men usynylatyn praktıkasyna sáıkestigin anyqtaýǵa baǵyttalǵan. Atalǵan standarttar IKAO-nyń 1-qosymshasy «Avıatsııa personalyna kýálikter berý», 6-qosymshasynyń I bóligi «Halyqaralyq kommertsııalyq áýe tasymaly — Ushaqtar» jáne 8-qosymshasy «Áýe kemeleriniń ushýǵa jaramdylyǵy» qujattarynda qamtylǵan. IASA baǵalaýy barysynda FAA sarapshylary avıatsııalyq zańnamany, zańǵa táýeldi normatıvtik quqyqtyq aktilerdi, sondaı-aq IKAO-nyń ushý qaýipsizdigin memlekettik baqylaýdy qamtamasyz etý júıesiniń segiz synı elementine sáıkes memlekettiń qadaǵalaýdy júzege asyrý qabiletin qarastyrady, — delingen Kólik mınıstrligi habarlamasynda.
2026 jylǵy baǵalaý FAA-men júrgizilgen daıyndyq jumystarynyń jalǵasy. 2024 jylǵy 26–30 tamyz aralyǵynda Qazaqstanda IASA boıynsha aldyn ala tehnıkalyq sholý júrgizildi. Odan keıin taraptardyń ózara is-qımyly aǵymdaǵy baǵalaýǵa daıyndyq maqsatynda jalǵasty. FAA sarapshylar tobynyń quramyna halyqaralyq avıatsııalyq quqyq, avıatsııa personalyn lıtsenzııalaý, áýe kemeleriniń ushýǵa jaramdylyǵy jáne ushý paıdalaný salalary boıynsha mamandar kiredi.
24 qyrkúıekte FAA sarapshylar tobynyń kommertsııalyq qyzmetti júzege asyrýǵa AQSh Kólik mınıstrliginen (DOT) ruqsat alýǵa ótinim bergen «Air Astana» áýe kompanııasyna (Astana qalasy) tehnıkalyq sapary josparlanǵan. Sapardyń maqsaty — ashyqtyqty qamtamasyz etý protsesi sheńberinde Qazaqstannyń avıatsııalyq ákimshiliginen (QAÁ) alynǵan aqparatty rastaý. Atalǵan sapar áýe kompanııasyna áýe tasymaldaýshy sertıfıkatynyń ıesi retinde júrgiziletin ınspektsııalyq tekserý bolyp tabylmaıdy.
IASA baǵalaýy aıaqtalǵannan keıin FAA QAÁ-pen qorytyndy brıfıng ótkizedi, odan keıin qaralǵan baǵyttar boıynsha jazbasha esep usynady. IASA baǵalaýy ushý qaýipsizdigin memlekettik qadaǵalaý júıesin odan ári jetildirý jáne Qazaqstan men AQSh arasynda tikeleı áýe qatynasyn ashý jónindegi jumysty ilgeriletý jolyndaǵy mańyzdy kezeń bolyp tabylady.
Aıta ketelik Qazaqstan avıatsııalyq oqıǵalardy tergeý salasynda IKAO tájirıbesin engizetini týraly jazǵan edik.
