F.Ońǵarsynovanyń poezııasy qazaq ádebıetiniń jarqyn betteri - E.Aǵymbaev
ASTANA. Qarashanyń 27-si. QazAqparat /Marlan Jıembaı/ - Búgin elordada Qazaqstannyń halyq jazýshysy, Memlekettik syılyqtyń laýreaty, aqyn Farıza Ońǵarsynovanyń 70 jyldyq mereıtoıyna arnalǵan baspasóz máslıhaty ótti,
dep habarlaıdy QazAqparat.
Jıynǵa qatysqan Astana qalalyq mádenıet basqarmasynyń bastyǵy Erkebulan Aǵymbaev óz sózinde 70 jyldyq mereıtoı aqynnyń óziniń ǵana emes, ol HH ǵasyrdyń sońy men HHІ ǵasyrdyń basyndaǵy qazaq poezııasynyń órken jaıýynyń ózindik esepti toıy bolyp sanalatyndyǵyn atap ótti.
«F.Ońǵarsynova óziniń ótkir de, syrshyl jyrlarymen qazaq poezııasyna jańalyq, ózindik órnek ákelip, ózindik otty jyrlarymen tutas bir aqyndar kóshin bastap kele jatqan tulǵa», dedi ol.
Onyń aıtýynsha, aqynnyń 10 tomdyq shyǵarmalar jınaǵy jaryq kórgen. Al taıaýda oqyrmandardyń tolassyz suranysyna ıe bolyp júrgen mahabbat jyrlary «Men saǵan ǵashyq emes em» degen ataýmen taǵy da jaryq kórmek.
Baspasóz máslıhatyna qatysqan Qazaqstan Jazýshylar odaǵy Astana qalalyq fılıalynyń basshysy, jazýshy Ákim Tarazı jınalǵandardy búgingi kúlli musylman halqynyń ulyq merekesi Qurban aıtymen quttyqtap, aqynmen kezdesýdiń osy aıtýly kúnge sáıkes kelýi Allanyń bergen raqymy dep oılaıtyndyǵyn jetkizdi.
«Farıza Ońǵarsynovanyń óleńderinde Mahambet óleńderiniń ekpini, Mahambet óleńderinde ǵana kezdesetin, lırıkamen qatar júretin ashý-yza ekpini bar. Farızany maqtaý qajet emes, maqtaný kerek», dedi Á.Tarazı.
Aqynnyń poezııasyna óziniń tánti ekendigin jetkizgen akademık Rymǵalı Nurǵalıev «qazaqtyń soǵysty kórgen Tahaýı Ahtanov degen qalamgeri boldy. Keıde óte dál aıtatyn. Máselen, Baýyrjan Momyshuly dúnıeden ótkende «myna standartty zamanda standartqa syımaǵan adam» degen edi. Al Farıza qyz da bolsa, er azamattyń júgin kótergen búgingi zamannyń Mahambeti» degendeı pikir bildirgenin keltirdi.
Sonymen qatar baspasóz máslıhatyna qatysqan fılologııa ǵylymdarynyń doktory, professor Qunypııa Alpysbaev F.Ońǵarsynovanyń shyǵarmashylyǵy áli kúnge deıin oqyrmannyń zor qyzyǵýshylyǵyn týdyryp kele jatqandyǵyn, sońynan ergen sińlilerine úlgi-ónege kórsetip otyrǵandyǵyn aıta kelip, 70 jyldyq mereıtoıymen quttyqtady.
Shara sońynda sóz alǵan F.Ońǵarsynova óziniń jýrnalıstıka salasynda biraz jyl eńbek etip, jastar basylymynyń batys óńirdegi tilshisi bolǵandyǵyn aıtyp, «ádebıet pen jýrnalıstıka bir úıdiń egiz balasy sekildi. Sondyqtan osy salada júrgen ini-qaryndastaryma rahmetimdi aıtamyn. Qazirgi kezde shyndyq aıtylmaıdy, «bireýdi jamanda dese jamandap jaza beredi» degen halyq arasynda pikir bar. Barynsha adal júrip, shyndyqty ashyp aıtyp, osy pikirdi túbegeıli ózgertý qajet», dedi.
