F.Olland Máskeýde: «Mıstral» týraly bir aýyz sóz bolmady

«Vnýkovo-2» áýejaıynda ol Reseı memleketiniń basshysy Vladımır Pýtınmen kezdesti.

V.Pýtın frantsııalyq áriptesine sapar úshin ýaqyt tapqany úshin alǵysyn aıtyp, bul kezdesýdiń Ýkraınadaǵy daǵdarysty sheshýge paıda ákeletinine senimin bildirdi. «Problemalar kúrdeli, olaı bolǵanymen bizdiń osyǵan baılanysty júrgizgen talqylaýymyz belgili bir oń nátıjesin berýde. Men sizdiń búgingi qysqa jumys saparyńyz kóptegen problemalardy sheshýge paıdasyn tıgizetinine senimdimin», - dedi F.Ollandpen kezdesýdi ashý kezinde Reseı Prezıdenti.

Óz kezeginde Olland Pýtınge qabyldaý úshin alǵysyn aıtyp, Reseı men Frantsııanyń ekijaqty qarym-qatynastaryndaǵy bógetterden óte alatynyna senimin bildirdi. «Men bir kezderi osyndaı bógetterdi, aramyzda boı kóteretin qabyrǵalardy buzý kerek dep oılaımyn jáne osyny jasaı alamyz dep senemin», - dep atap ótti Frantsııa basshysy.

Ýkraına týraly aıta otyryp, Olland: «Bizdiń «jıyrmalyq» aıasynda bastaǵan pikirtalasymyzdy jalǵastyrý qajet. Reseı, Frantsııanyń oǵan talpynysy bar, olar osyny tileıdi. Altynshy maýsymda biz sheshimderdi taýyp, birge jumys isteý qajettiligi týraly aıttyq. Biz Angela Merkelmen sóılestik. Reseı men Frantsııa qajetti sheshim taba alady dep oılaımyz», - dedi.

Kezdesýden keıin Pýtın tilshilerge «Mıstral» taqyrybynyń qozǵalmaǵanyn aıtty. «Mıstral» týraly sóılespedik, ol týraly sóz bolmady. Kelisim-shart bar, bul zańdy qujat, ol oryndalady. Men prezıdentke eshqandaı suraqtar qoımadym, eshteńe aıtpadym da», - dedi reseılik kóshbasshy.

Eger kelisim-shart buzylsa, Reseıdiń Frantsııaǵa erekshe narazylyǵy bolmaıdy, biraq ol buǵan deıin aldyn ala tólengen aqshasyn qaıtarýǵa úmitti.

«Biz bul taqyryptaǵy oqıǵalardyń kez kelgen damý jelisine túsinistikpen qaraýdamyz jáne qaraıtyn bolamyz», - dep túıindedi V.Pýtın.