F.Hadjıeva ata-ájesiniń amanatyn oryndap, qıyn kezeńde pana bolǵan N.Nazarbaevtyń otbasyna alǵys aıtty

ASTANA. QazAqparat - Jer aýdarylǵandar úshin qasıetti jer - Qazaqstan. Búgin Astanadaǵy Beıbitshilik jáne kelisim saraıynda QR Prezıdenti Nursultan Nazarbaevtyń tóraǵalyǵymen ótken Qazaqstan halqy Assambleıasynyń «Táýelsizdik. Kelisim. Bolashaǵy birtutas ult» kún tártibimen ótken XXIV sessııasynda Qazaq ulttyq aýyl sharýashylyǵy ýnıversıtetiniń 3-shi kýrs stýdenti Farızat Hadjıeva osylaı dedi.

«Asa mártebeli Nursultan Ábishuly! Bıyl jarııalanǵan Alǵys aıtý kúni qansha tarıhty eske túsirip, men sııaqty jastardyń júregine oı saldy. Men búgin bul sahnaǵa otbasymnyń amanatyn óteý úshin shyǵyp turmyn. Jer aýdarý jyldarynda meniń atamnyń otbasyn qaıyrymdy, qonaqjaı qazaq otbasy panalatypty. Olardyń ózi eki bólmeli saman úıde turady eken. Nursultan Ábishuly, men Farızat Hadjıeva Sizdiń otbasyńyz, Ábish atanyń otbasy panalatqan Hyzyr Hadjıevtiń nemeresi, Haret Hadjıevtiń shóberesimin», - dedi ol.

Osy rette QR Prezıdenti Farızattyń atasyn eske túsirip, aq nıetine rızashylyǵyn bildirdi.

«Nursultan Ábishuly, eger Ábish atanyń qamqorlyǵy bolmasa, mende búgin osy sahnada turmas edim. Sol adamgershilik, sol keńpeıildik, sol qamqorlyq úshin Sizdiń ata-babalaryńyzǵa, sizdiń otbasyńyzǵa aıtar alǵysymyz, aq tilegimiz sheksiz», - F.Hadjıeva.

Ol Ábish atanyń bastamasymen óz atasynyń 2 bólmeli saman úı turǵyzǵanyn da aıtty.

«Bul sol ýaqytta arnaıy jer aýdarylǵandar úshin naǵyz saltanatty saraı bolatyn. Qonys toıyna Ábish ata buzaý syılapty. Dál sol syılyq bizdiń otbasymyzdyń baqyt pen molshylyq nyshanyn aınalǵan jáne bul tarıh bizde urpaqtan-urpaqqa mura bolyp keledi. Nursultan Ábishuly, bolgar halqynda barlyq musylmandar úshin qasıetti jer Mekke men Medına degen sóz bar. Al jer aýdarylǵandar úshin qasıetti jer - Qazaqstan». - dedi ol.

«Farızat, óziń de biletin shyǵarsyń, seniń atańnyń bir qyzy meniń týysyma turmysqa shyqqan. Sondyqtan bizdiń týystyq baılanysymyz bar. Saǵan sáttilik tileımin»,- dedi Elbasy óz kezeginde.