Ejelgi tarıh pen mádenıetti zamanaýı turǵyda zertteý qajet - Vıktor Zaıbert

ASTANA. QazAqparat - Belgili tarıhshy, ál-Farabı atyndaǵy Qazaq Ulttyq ýnıversıtetiniń arheologııa jáne dala órkenıeti ǵylymı-zertteý ınstıtýtynyń dırektory Vıktor Zaıbert Uly dala men ejelgi mádenıettiń qundylyǵy týraly áńgimelep berdi, dep habarlaıdy QazAqparat tilshisi.

«Dala ómiri júıesi búkil álemge kóptegen jańashyldyqtar ákeldi. XVIII-XX ǵ.ǵ  tarıhı derekterde jazylǵandaı, dala - kóshpeli halyqtardyń ótetin dálizi ǵana emes, onda búkil Eýrazııa keńistigine taraǵan jańashyldyqtar paıda boldy, mine osynysymen de Uly dala men onyń ejelgi mádenıet qundy», - dedi V.Zaıbert.

Kóne derekkózderi kórsetkendeı, dala órkenıetiniń deńgeıi tek qana materıaldyq baǵyttaǵy kórsetkishtermen emes, sondaı-aq rýhanı qundylyqtarmen de baı.

«Tarıhymyzdyń keleshek damýynyń negizi, ótken myńjyldyqtardyń tereńinde jatyr. Ejelgi tarıhymyz ben mádenıetimiz týraly qundy derekterdi zamanaýı turǵyda zerttep, zerdeleý arqyly qoǵamymyzdyń materıaldyq jáne rýhanı damý dınamıkasyn arttyra alamyz», -dedi ol.

Tanymal tarıhshy V.Zaıberttiń pikirinshe, Elbasynyń «Uly dalanyń jeti qyry» maqalasy - memlekettik mańyzy bar ıgi bastamalardyń jalǵasy.

«Prezıdent aıtyp ótkendeı, bul bir jaǵynan bizdiń qoǵamymyz ben ǵylymymyzdyń damýynyń belgisi, ekinshi jaǵynan el erteńi úshin fılosofııalyq oı-tolǵaýymyzdyń keleshegin anyqtap berdi», - dedi belgili tarıhshy.

Buǵan deıin habarlaǵanymyzdaı, búgin QR Prezıdenti janyndaǵy Qazaqstan strategııalyq zertteýler ınstıtýtynda Elbasynyń «Uly dalanyń jeti qyry» maqalasyn talqylaýǵa arnalǵan dóńgelek ústel ótti.