Ejelgi Saraıshyqty kúzde tamashalaı alatyn shyǵarmyz - arxeolog Samashev
ASTANA. QazAqparat - Arxeolog ǵalym Zeınolla Samashevtiń aıtýynsha, bıyl qalyń túsken qardy eskere otyryp, Jaıyq ózeniniń arnasyn bekitý jumystaryn tezdetý kerek. Áıtpese, Saraıshyq qalasyn saqtaýǵa bólingen qyrýar bıýdjet qarjysy zaıa ketedi, dep xabarlaıdy QazAqparat tilshisi.
«Biz qazǵanda sýdan beri qaraı 20 metr bolǵan. Qazir sol aradaǵy kóne ǵımarattardy túgel sý shaıyp ketti. Sonda qarańyz, 1996 jyldan beri qaraı Saraıshyq qalasynyń 20-30 metr ýchaskesi sýdyń astyna ketip qaldy. Al onyń aldynda sonaý 1937 jyly alǵashqy qazba jumystarynan bastap shahardyń 100-150 metr jerin sý shaıyp ketýi ábden múmkin. Sol kezde negizgi úlken saraılar, jaqsy ǵımarattar, kerýen saraılar, monshalar, meshitteri bolǵan. Sodan keıin kirpish pen qumyra jasaıtyn peshter - bári-bári sýdyń astyna ketti. Degenmen, qalǵan jaǵynda da ondaı qurylystar bolýy múmkin. Saraıshyqta tıyn soqqan oryn bolǵan. Onyń da orny bar sııaqty. Sosyn Qasym xannyń jerlengen orny, ol ketip qaldy ma, joq pa, osyny anyqtaýymyz qajet. Endi, úmitimiz bar. Ózen jaǵasyn bekitý jumystary mamyrǵa deıin aıaqtalady degen jospar bar. Óıtkeni bıyl qar qalyń tústi. Sol sebepti qazir kúni-túni jumys istep jatyr. Áıtpese, qyrýar qarjy dalaǵa ketedi», - dedi arxeolog Zeınolla Samashev jýrnalısterge bergen suxbatynda.
Ǵalymnyń aıtýynsha, eski qalanyń biraz jeri áli de bar. Alaıda naqty aýdany belgisiz. Sebebi ol jer tolyǵymen zerttelmegen. Ózen jaǵasyn bekitý jumystary aıaqtalǵannan keıin arxeologtar óz jumysyna kirisedi. Olardyń artynan restavratorlar júrip, Saraıshyq qalasyn qalpyna keltiretin bolady.
«Sóıtip, konservatsııa jumystary atqarylyp, aspanasty mýzeı paıda bolady. Ony kúzde kóre alatyn shyǵarmyz», - dep atap kórsetti arxeolog Samashev.
Aıta keteıik, búgin Astanada «Saraıshyq - uly qala tarıxy» taqyrybynda Halyqaralyq konferentsııa bastaldy. Májilistiń ashylý rásiminde sóz sóılegen QR Mádenıet jáne sport mınıstri Arystanbek Muxamedıuly aǵymdaǵy jylda Saraıshyq qalasynyń konservatsııalanatynyn jetkizdi .
