«Ejelgi Rım» meımanhanasyndaǵy jappaı tóbeles: Qaraǵandyda aldyn ala sot otyrysy ótti
QARAǴANDY. QazAqparat – Qaraǵandyda «Ejelgi Rım» meımanhanasynyń janynda bolǵan jappaı tóbeleske qatysty is boıynsha aldyn ala sot otyrysy ótti. Onyń barysynda 13 aıyptalýshynyń biri sýdıaǵa tergeý sharalary kezinde oǵan kúsh kórsetilgenin jetkizdi, dep habarlaıdy QazAqparat tilshisi.
Aldyn ala sot tyńdaýy AK-159/1 mekemesinde ótti. Atalmysh is boıynsha 13 adamǵa aıyp taǵylýda. Olardyń 12-si segiz aı boıy qamaýda otyr. Kúdiktilerge QR QK-niń 293-baby 3-bóligi («Aldyn ala sóz baılasý arqyly adamdar tobymen jasalǵan buzaqylyq») boıynsha kiná taǵylýda. Al sottalýshylardyń biri – ıÝsıf Nýrýl adam óltirdi dep aıyptalýda. Kúdiktilerdiń qatarynda, sondaı-aq elden qashyp úlgergen Narek Gýrýrıan bar. Ol Reseıdiń quqyqqorǵaý organdaryna óz erkimen berildi. Biraq adam óltirgenin moıyndamady. Jáne osy kúnge deıin Qazaqstanǵa ekstradıtsııalanǵan joq.
Sot otyrysy barysynda ózge aıyptalýshylardyń qorǵaýshylary birneshe ótinimhat túsirdi. Advokattar qylmystyq-is júrgizý kodeksiniń buzylýyna baılanysty isti prokýratýraǵa qaıtarýdy, sottalýshylarǵa anaǵurlym jeńilirek bultartpaý sharasyn qoldanýdy surady. Sondaı-aq kúdiktilerdiń biri – Kaır Nadyrbekov tergeý organdary tarapynan ózine kúsh kórsetilgenin jáne aıǵaqzattardyń jalǵandyǵyna shaǵymdandy.
Belgili bolǵandaı, Qaraǵandy oblysynyń qylmystyq ister jónindegi mamandandyrylǵan aýdanaralyq sotynyń sýdıasy Shárip Seısembaev ótinimhattardy qarap, olar boıynsha sheshimdi 6 qyrkúıek kúni jarııalaıdy.
Eske salaıyq, 2019 jyldyń 1 qańtaryna qaraǵan túni Qaraǵandydaǵy «Ejelgi Rım» meımanhanasynda janjal bolyp, onyń sońy jappaı tóbeleske ulasty. Saldarynan bir adam kóz jumdy, taǵy úsheýi pyshaq jaraqattaryn aldy. Quqyqqorǵaý organdary QR qylmystyq kodeksiniń 99 («Adam óltirý») jáne 293 («Buzaqylyq») baptary boıynsha qylmystyq ister qozǵady.
