Ejelgi Egıpettiń sý astyna ketken qalasynyń hramy tabyldy
NUR-SULTAN - KAIR. QazAqparat – Ejelgi Egıpettiń sý astyna ketken Geraklıon qalasyn zerttep júrgen draıverler birshama qundy dúnıelerdi tapty, dep habarlaıdy QazAqparat tilshisi Live Science basylymyna silteme jasap.
Mysyrdyń Ejelgi eskertkishter mınıstrliginiń málimdeýinshe, tabylǵan artefaktilerdiń arasynda hramnyń qaldyqtary, altyn áshekeıler, monetalar, saltanatty qaıyqtyń bólikteri bar.
Gerakldyń esimimen atalǵan qala kezinde halyq qujynaǵan megapolısterdiń biri bolǵan. Ol bizdiń zamanymyzǵa deıingi VIII ǵasyrda Nil ózeniniń Jerorta teńizine quıar saǵasyna salynǵan. Kleopatra perǵaýynnyń ózi osy qaladaǵy hramdardyń birinde taqqa otyrǵan. Keıin, shamamen osydan 1500 jyl buryn ony sý basty. Qazir ol 45 metr tereńdikte qalyp qoıǵan.
Ǵalymdar 2000 jyly qalany tapqannan keıin, tarıhtyń buryn belgisiz qyrlary ashyla bastady. Sońǵy zertteýler kezinde arheologtar záýlim hramnyń qaldyqtaryn tapqan.
Budan bólek, 75 qaıyq tabylǵan. Sonyń ishinde saltanatty sharalar kezinde qoldanylǵan №61 qaıyqtyń jetispeı turǵan bóligi de bar.
Arheologtar qaıyqty qurastyrǵan soń, onyń uzyndyǵy 13 metr, eni 5 metr ekendigi belgili boldy. Qola jáne altyn monetalar, áshekeı buıymdary da tabylǵan. Aıtpaqshy, Geraklıonnan tabylǵan qola monetalar ІІ Ptolemeı bılik qurǵan tusta, bizdiń zamanymyzǵa deıingi 283-246 jyldary soǵylǵan.
