Ejelgi ańyzdar negizinde anımatsııalyq almanah jasap shyǵarylady – mınıstrlik

ASTANA. QazAqparat – Mádenıet jáne sport mınıstrliginiń «Qazaqanımatsııa» shyǵarmashylyq birlestigi túrkitildes elderge ortaq ejelgi ańyzdar negizinde anımatsııalyq almanah jasap shyǵarýdy josparlap otyr, dep habarlaıdy QazAqparat.

Mınıstrlik málimetine sáıkes, joba aıasynda 2023 jyly hronometrajy 5 mınýttan asatyn keminde 10 anımatsııalyq týyndy jaryqqa shyǵady dep kútilýde.

Qazir stsenarıılerge baıqaý jarııalandy. Oǵan: túrkitildes elderdiń uly tulǵalary, qasıetti janýarlary men jer-sý ataýlary, túrkitildes elderdiń ortaq merekeleri men ulttyq oıyn-saýyqtary týraly ańyzdar taqyryptarynda shyǵarmashylyq jumystar qabyldanady.

Pıtchıng qorytyndysy boıynsha tańdalǵan 10 úzdik joba ashyq qorǵaý múmkindigine ıe bolady.

«Bul jobanyń mańyzy óte úlken. Qazir stsenarııler baıqaýy jarııalandy. Biz avtorlarǵa ótken tarıhymyzdy búgingi kúnmen baılanystyrýǵa bolatyndaı shyǵarmashylyq erkindik berip otyrmyz. Sol sebepti úmitkerlerden taqyrypqa saı jáne kórkemdik deńgeıi joǵary jumystar kútemiz»,- dedi «Qazaqfılm» kınostýdııasynyń vıtse-prezıdenti Serik Ábishev.