Ejelgi Jibek Jolymen 3000 shaqyrymǵa jol tartqan túıe kerýeni - sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
XVI ǵasyrda soǵylǵan teńgelerdi elden shyǵarmaq bolǵan azamat ustaldy – ÓzA
Surhandarııa oblystyq keden basqarmasynyń «Termez áýejaıy» shekara beketinde kedenshilerdiń qyraǵylyǵynyń arqasynda tarıhı qundylyǵy zor jádigerlerdi elden áketpek bolǵan azamat qolǵa tústi.
Bul týraly osy aptada «ÓzA» aqparat agenttigi habarlady.
Habarlamada aıtylǵandaı, shetelge ushqaly turǵan jolaýshy kedendik tekserý kezinde belgilengen tártip boıynsha baqylaýdan ótti. Alaıda onyń qol júgin tekserý barysynda qyzmetkerler aýyzsha suraý kezinde aıtylmaǵan, arab jazýlarymen órnektelgen bes dana kóne metall teńgeni anyqtady.
Keden mamandary tabylǵan zattardyń tarıhı mańyzyn naqtylaý maqsatynda kórkemdik saraptama taǵaıyndady. Sarapshylardyń qorytyndysyna sáıkes, bul teńgeler XVI ǵasyrǵa tıesili bolyp, olardyń betine arab jazýymen dinı naqyshtaǵy sózder men sol dáýirdiń bıleýshileriniń esimderi qashalyp jazylǵan. Bul jádigerler óz kezeńiniń mádenı jáne tarıhı tynysyn aıqyn kórsetetin qundy mura retinde tanyldy.
Ózbekstandyq BAQ-tyń dereginshe, qoldanystaǵy zańnamaǵa sáıkes, soǵylǵanyna elýden astam jyl ótken mádenı qundylyqtardy el aýmaǵynan shyǵarýǵa qatań tyıym salynady. Qazirgi ýaqytta kóne teńgeler Termez arheologııa murajaıynyń qoryna tapsyryldy. Al keden organdary atalǵan derek boıynsha tergeýge deıingi tekserý jumystaryn júrgizip jatyr.
Qazaqstan men Mysyr afrıkatanýshy mamandardy daıarlaýǵa múddeli - «Eurasia Today»
Qazaqstan men Mysyr ókilderi afrıkatanýshy mamandyǵy boıynsha kadrlar daıarlaý jáne qurlyqtaǵy keń taraǵan afrıkalyq tilderdi meńgerý máselelerin kóterdi, dep habarlaıdy «Eurasia Today» aqparat agentti.
Atalǵan basylymnyń habarlaýynsha, bul másele Qazaqstan Respýblıkasynyń Mysyr Arab Respýblıkasyndaǵy Elshisi Asqar Jeńis pen Kaır ýnıversıtetiniń Rektory Muhammed Ábdelsadeqtiń kezdesýinde kóterildi.
Taraptar kezdesýde joǵary bilim salasyndaǵy yntymaqtastyq jáne ýnıversıtetter arasyndaǵy baılanysty jandandyrý máselelerin talqylaǵan. Kezdesý barysynda eki eldiń bilim salasyndaǵy yntymaqtastyǵynyń qazirgi jaǵdaıy jáne ony odan ári damytý perspektıvalary jóninde pikir almasyldy.
Ejelgi Jibek Jolymen qaıta júrip, 3000 shaqyrymǵa jol tartqan túıe kerýeni - «Halyq gazeti»
3 qarashada saǵat 17:00-de 33 túıe, 3 jylqy, 30 komanda múshesi jáne 4 qural-jabdyq kóliginen turatyn «Shyǵys Tıanshannan kelgen túıe kerýeni» Gansý ólkesiniń Gýlan aýdanyna jetti, dep jazady «Halyq gazeti».
Atalǵan BAQ-tyń dereginshe, bul kerýen 22 tamyzda Shyńjańdaǵy Barkól Qazaq avtonomııalyq aýdanynan jolǵa shyqqannan beri shamamen 1600 shaqyrym jol júrgen. Olardyń sońǵy aıaldaıtyn jeri Henan ólkesiniń Loıan qalasy. Kerýen shamamen 3000 shaqyrymnan astam sapardan soń mádenı ekspedıtsııasyn aıaqtamaq.
Qytaılyq BAQ-tyń málimetinshe, túıe kerýeniniń qońyraý úni arǵy zamannan jetkendeı áser beredi. «Shyǵys Tıanshan túıe kerýeni» tarıhtyń izin qaıtalap, Jibek Jolynyń rýhyn jáne Shyńjań buıymdarynyń sulýlyǵyn tanystyryp jatyr. Ujym jumysy Qytaıdaǵy áleýmettik jelide birneshe ret qyzý talqy reıtınginde boldy. Marshrýttyq dınamıka men mádenı ıntegratsııa is-sharalary kópshiliktiń nazaryn aýdaryp, qazirgi ýaqyttaǵy eń kóp qaralatyn «Jibek Joly elshisine» aınalǵan.
Sonymen qatar osy aptada «Halyq gazeti» basylymynda «Shandýn ólkesindegi bir taý qos túske boıaldy» degen aqparat jaryq kórdi.
Qytaılyq BAQ-tyń habarlaýynsha, Qytaıdyń Shandýn ólkesiniń Tszınan óńirinde bir taý qos túske boıalǵan. Kúzdiń aıaǵynda Tszınan óńiriniń Setszy taýynda (Shaıan taýy) «bir taý eki túske boıalǵan» ǵajaıyp kórinis kóptegen týrısti baýrady.
Keltirilgen derekterge súıensek, Setszy taýy jota arqyly ekige bólinip jatady. Taýdyń soltústik betkeıine arshalar egilgen, ońtústik betkeıine saryaǵash otyrǵyzylǵan. Kúzdiń kelýimen saryaǵashtar jasyldan qyzyl túske boıalyp, «bir taý eki túske engen» erekshe kórinis qalyptasty.
Berlındegi Iran elshiliginde «Iran kilem óneri» kúni ótti - ParsToday
Berlındegi IIR elshiliginiń konferents-zalynda Germanııada turatyn birqatar elshiler men dıplomattar jáne shynaıy ırandyq mádenıet pen óneriniń áýesqoılary tobynyń qatysýymen «Iran kilem óneri» kúni ótti, dep jazdy ParsToday aqparat agenttigi.
Parstoday aqparat agenttiginiń ISNA agenttigine silteme jasap habarlaýynsha, «Iran kilem óneri» kúni rásiminde IIR-nyń Germanııadaǵy elshisi Madjıd Nılı ıran kilemin ırandyqtardyń óneriniń, shydamdylyǵynyń jáne talǵamynyń sımvoly dep sanap, onyń Irannyń baı mádenıetin álemge tanystyrýdaǵy mańyzdy rólin atap ótken.
Irandyq BAQ-tyń dereginshe, Irannyń Germanııadaǵy elshisi eki el arasyndaǵy tarıhı qarym-qatynastardyń damýyndaǵy ıran kilemderiniń róline toqtala otyryp, birlesken ıran-german kilem úıin qurýdy osy saladaǵy ózara árekettesýdi arttyrý jáne jeńildetý múmkindigi dep sanady.
Bul rásimde Irannyń ártúrli aımaqtarynan ákelingen tamasha jáne qundy kilemder kórsetilip, Iran jeriniń mádenı jáne kórkemdik ártúrliligin kórsetti jáne qatysýshylardyń jyly lebizin bildirdi. Іs-sharanyń taǵy bir tartymdy bóligi osy saladaǵy eki tanymal ustazdyń ıran kilemderiniń úlgilerin jasaý boıynsha sheberlik sabaǵy jáne sulýlyǵyn kórsetetin beınerolık bolǵan.
Aıta keteıik, Germanııa uzaq ýaqyt boıy Iran kilem saýdagerleriniń Eýropadaǵy negizgi ortalyǵy bolyp keldi.
Sondaı-aq osy aptada Parstoday-de «Iran men Aýǵanstan arasyndaǵy temirjol yntymaqtastyǵy Qytaıdy Eýropamen baılanystyrý baǵyty bolyp tabylady» degen taqyryptaǵy aqparat jarııalandy.
ParsToday basylymynyń málimetinshe, Jol jáne qala qurylysy mınıstriniń orynbasary jáne Iran temirjol kompanııasynyń bas dırektory Qytaıdyń temirjol jelisin Aýǵanstan men Irannyń temirjol baǵyttary arqyly Eýropamen baılanystyrý josparyn jarııalaǵan.
Keltirilgen derekterge súıensek, Irannyń halyqaralyq dálizderdegi strategııalyq rólin atap ótken «Iran temir joldary» kompanııasynyń bas dırektory Djabar Álı Zakerı Qytaıdyń temirjol jelisin Aýǵanstan men Iran arqyly Eýropaǵa qosý josparlaryn jarııalady jáne Mazarı-Sharıf-Gerat temirjol jelisin aıaqtap, ony Iran arqyly ótetin baǵyttarmen baılanystyrý Aýǵanstandy ashyq sýlarmen jáne Eýropa naryqtarymen baılanystyratynyn aıtqan.
Túrkııada kıber tyńshylyqqa qarsy reıdterde eki kúdikti qamaýǵa alyndy - TRT
Senbi kúni Túrkııa barlaý qyzmeti jáne jandarmerııa kúshteri Stambýl men Adanada úılestirilgen tintý jumystary barysynda kıbershpıondyq jelini nysanaǵa alyp, eki kúdiktini ustady.
Bul týraly osy aptada Túrkııa Radıo Televızııa portaly habarlady. Atalǵan BAQ-tyń keltirgen málimetterine súıensek, operatsııa Ankara bas prokýratýrasynyń nusqaýymen júrgizildi.
Tergeýshiler eki kúdiktiniń iri kıberqylmys uıymymen baılanysy baryn anyqtady. Tintý kezinde tártip saqshylary zańsyz kıberqımyldarda paıdalanylýy múmkin dep kúdik týǵyzǵan tsıfrlyq tehnıka men shetelmen baılanysy bar júıelerdi tárkiledi.
Kúdiktiler tergeý kezinde moıyndap, jeke málimetterge zańsyz qol jetkizýge qatysy bar adamdar men toptar týraly aqparat berdi.
Eki kúdikti de Túrkııanyń kıberqaýipsizdik zańy boıynsha resmı túrde qamaýǵa alyndy, al shetelde júrgen basqa tulǵalarǵa tutqyndaý orderi shyǵaryldy.
Tergeý áli de jalǵasyp jatyr.