Frantsııanyń murajaılary men kitaphanalary alǵash ret ejelgi Qazaq memleketin zertteýge kómektespek
Strasbýrgtaǵy Qazaqstannyń Bas konsýldyǵynyń qoldaýmen Lotarıngııa murajaıy alǵash ret Qazaq memleketi týraly zertteý úshin XVI ǵasyrdyń sırek kezdesetin globýsyn, al Strasbýrgtyń ulttyq kitaphanasy qazaqtardyń tarıhy týraly ortaǵasyrlyq atlastar men kartalardy kórsetpek, dep habarlaıdy QazAqparat.
QR Syrtqy ister mınıstrliginiń málimetinshe, murajaı Frantsııanyń shyǵysynda Nansı qalasynda, Lotarıngııa gertsogtarynyń tarıhı Saraıynda ornalasqan. Kartografııa kontekstinde murajaıdyń basty asyl tasy – «Nansı globýsy», gertsog Karl IV tapsyrysy boıynsha kúmis pen altynnan ortaǵasyrlyq kýbogy túrinde jasalǵan. Onyń syrtynda sol kezdegi eýropalyqtarǵa belgili málimetter men jańalyqtarǵa negizdelgen túbegeıli geografııalyq sıpattamasy bar.
Murajaı jádigeriniń saqtaýshysy Perr-Ippolıt Pene, Bas konsýl Ánýarbek Ahmetovpen jáne qazaq ǵalymy Muhıt-Ardager Sydyqnazarovpen áńgimelesý barysynda ǵylymı jáne mádenı turǵydan Qazaqstanmen yntymaqtastyqqa daıyndyǵyn bildirdi.
«Bizdiń almasýlarymyz nátıjeli bolady dep úmittenemiz. Tarıh pen mádenıet týraly odan da kóp bilim berý arqyly biz murajaılarda bar biregeı artefaktiler men jaýharlardy tanymal ete alamyz dep senemiz. Biz yntymaqtastyqqa daıynbyz jáne ashyqpyz. Sırek globýsymyz sizdiń elińizdiń biregeı tarıhyn aıqyn kórsetýge jáne qazaqtardyń nazaryn aýdarýǵa múmkindik beretdi», – dedi P. Pene.
Frantsııadaǵy mańyzdylyǵy men kitap qory boıynsha ekinshi orynda turǵan XVI-XVIII ǵasyrlardaǵy biregeı atlastary men kartalary bar Strasbýrgtyń ulttyq kitaphanasy bizdiń ǵalymdar men dıplomattar úshin Qazaq memleketiniń geografııalyq ornalasýy, onyń aımaqtaǵy saıası jáne ekonomıkalyq yqpaly týraly qundy málimetterdi qamtıtyn óz qoımalaryn ashty. Eýropa ortalyǵynda ejelgi jol qıylysynda ornalasqan Strasbýrg kitaphanasynda qundy kitaptar men artefaktilerdiń baı jınaqtamasy bar.
Kitaphananyń Ǵylymı saıasat jáne halyqaralyq yntymaqtastyq jónindegi dırektory Krıstof Dıde Qazaqstanǵa tarıhyn zertteýge járdemdesý úlken mártebe ekenin aıtyp, ǵylymı, mádenı jáne gýmanıtarlyq baılanystardy damytýǵa qyzyǵýshylyq bildirdi.
«Biz Qazaqstanmen birlesken jobalardy qarastyrýǵa daıynbyz jáne keleshekte de yntymaqtastyǵymyz arta túsedi degen úmittemiz. Sizderge paıdaly bolatyn kitaphananyń biregeı tarıhy men úlken áleýeti bar», – dep atap ótti K. Dıde.
