«Eır Astanaǵa» 6 mln-nan astam aıyppul salyndy
ALMATY. QazAqparat - «Eır Astana» AQ-na 6,7 mln teńge aıyppul salyndy dep habarlaıdy «QazAqparat» Almaty qalalyq sotynyń baspasóz qyzmetine silteme jasaı otyryp.
«Almaty qalasynyń mamandandyrylǵan aýdanaralyq sotynda «Eır Astana» AQ-na qatysty ákimshilik quqyq buzýshylyq týraly QR Kodeksiniń 162-baby boıynsha ákimshilik is qaraldy. Sotta Qazaqstan Respýblıkasy Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıtetiniń 5.09.2016 jylǵy №240-O buıyryǵy negizinde áýe kompanııasy tarapynan básekelestikti qorǵaý salasyndaǵy zań buzylǵany anyqtaldy», - delingen habarlamada.
Sot baspasóz qyzmetiniń habarlaýynsha, tekseris júrgizý barysynda AQ-tarapynan tekserýge alynǵan nysanǵa kirýge kedergi keltirilgen. Sonymen qatar, quzyrly organ tarapynan suratylǵan aqparattar ýaqytynda (2016 jyl 7 qazanǵa deıin) tapsyrylmaǵan.
«Osyǵan baılanysty AQ tarapynan QR Kásipkerlik kodeksiniń 221-babynyń 1-bóliginiń 1-tarmaǵy buzyldy. Zańnyń bul tarmaǵynda monopolııaǵa qarsy organnyń jaýapty qyzmetkeri tekseris júrgizý barysynda tekserýge alynǵan nysanǵa kedergisiz kirýge quqyly ekenin kórsetilgen.
Sonymen qatar, atalǵan Kodekstiń 221-babynyń 1-bóligi 3-tarmaǵy boıynsha quzyretti tulǵa tekseris barysynda monopolııaǵa qarsy organ tarapynan belgilengen merzimde aqparatty, qujattardy, kóshirmelerdi, jazbasha jáne aýyzsha túsiniktemeni mezgilinde (5 jumys kúni ishinde) suraýǵa ókiletti ekeni aıtylǵan.
Osyǵan baılanysty, sot qaýlysymen, «Eır Astana» AQ Ákimshilik quqyq buzýshylyq týraly kodeksiniń 162-baby men atalǵan kodekstiń 58-babynyń biriktirilýimen kináli dep tanylyp, 3200 aılyq eseptik kórsetkish kóleminde, 6 787 200 teńge aıppul tóleýge mindetteldi.
Qaýly zańdykúshine engen joq.
