«Eır Astana» jolaýshylaryna et asyp, qurt tarata ma
ALMATY. QazAqparat - «Eır Astana» áýe kompanııasy ushaqtarynyń borttarynda ulttyq taǵamdarymyzdyń berilýi jáne jolaýshylarǵa konfet ornyna qurt úlestirilýi múmkin be? QazAqparat tilshisi oqyrman kókeıinde júrgen birqatar suraqtardyń jaýabyn izdep kórdi.
«Eır Astana» áýe kompanııasy baspasóz qyzmetiniń málimetine súıensek, qazirgi ýaqytta kompanııa halyqaralyq reısterdi oryndaǵanda ushyp shyqqan eldiń tamaǵyn jolaýshylarǵa usynyp otyr.
«Mysaly, Delıden ushyp shyqqan jolaýshylarǵa úndistandyq Matar Panır taǵamy usynylsa, Beıjińnen mingen jolaýshylarǵa qytaı shaıandary qýyrylǵan kespesimen beriledi. Al, 1 sáýirden bastap, Astanadan ushyp shyqqan barlyq reısterdiń ekonom-klastaǵy jolaýshylaryna palaý berile bastady», - dedi ÁK mamandary.
Kompanııa ókilderiniń aıtýynsha, bızness-klastaǵy jolaýshylarǵa palaý mamyr aıynan bastap berilmek eken.
«Ultymyzdyń túrli taǵamdaryn as mázirine endirýge bolady. Alaıda, asty babymen ázirlep, onyń dámin keltirý jaǵy qıyndyq týǵyzyp otyr. Máselen, et asatyn bolsaq, onyń kespesi, ıa jaımasy sýyp qalady, ony sol kúıinde qazannan túsirip bere almaısyń. Onyń ústine, ony daıyndaıtyn quraldar da qajet. Qazirgi ýaqytta kompanııa tehnıka satyp alý jaǵyn qarastyryp otyr. Manty tek bıznes-klastaǵy jolaýshylarǵa ǵana beriledi. Sebebi, ony da qolmen túıip, sýytpaı usyný kerek. Degenmen, aıta keteıik, áýe kompanııamyz as mázirindegi taǵamdar túrin kóbeıtý boıynsha izdenisin toqtatqan emes», - dedi atalǵan áýe kompanııasynyń mamandary.
Sonymen qatar, biz áýe kompanııasy ne sebepten ushaq áýege kóterilgende jáne qonýǵa baǵyt alǵanda úlestiriletin konfet ornyna qurt taratylmaıtynyn suradyq.
«Eır Astana» áýe kompanııasynyń mamandary konfettiń qulaq bitelgende jaqsy kómektesetin qasıeti bar ekenin, al qurttyń quramynda ondaı qajetti zattyń joq ekenin aıtty.
