«Eır Astana» jolaýshylardan bortta Galaxy Note 7 telefonyn qospaýdy suraıdy
ASTANA. QazAqparat - «Eır Astana» áýe kompanııasynyń eskertýinshe, ushaq borttarynda Samsung Galaxy Note 7 telefonyn qosyp, qýattaý óte qaýipti.
«Eır Astana» áýe kompanııasy jolaýshylardan ushaq borttarynda Samsung Galaxy Note 7 telefonyn qosýdan, qýattaýdan, sondaı-aq osy telefondy júkke tapsyrýdan bas tartýdy suraıdy. Halyqaralyq áýe kólik uıymynyń habarlaýynsha, bul markaly telefon birneshe ret óz-ózinen janyp ketkendikten, Samsung kompanııasy Galaxy Note 7 qurylǵysyn keri qaıtaryp jatyr»,-dep habarlady «QazAqparat» tilshisiniń resmı saýalyna jaýap bergen «Eır Astana» kompanııasynyń baspasóz qyzmeti.
«Eır Astana» kompanııasynyń basty maqsaty - qaýipsizdik, sondyqtan, jolaýshylar áýe kompanııanyń bul sharasyna túsinistikpen qaraıdy degen úmittemiz»,-deıdi kompanııa qyzmetkerleri.
Esterińizge sala keteıik, Samsung kompanııasy bıyl 19 tamyzda Galaxy Note 7 gadjetin satylymǵa shyǵarǵan. Biraq, kóp uzamaı (bul qurylǵylar ózdiginen jaryla bastaǵan, álem boıynsha «Samsung» kompanııasy osyndaı 35 oqıǵa tirkegen) kompanııa óziniń resmı saıtynda telefon satyp alǵan adamdarǵa ony óshirip, keri qaıtarýǵa bolatynyn habarlaǵan.
